თბილისი, 11 ნოემბერი — Sputnik. მომღერალი სალომე კორკოტაშვილი, რომელიც სკანდალური ფილმის წინააღმდეგ კინოთეატრებთან მიმდინარე აქციების ერთ-ერთი ორგანიზატორის გია კორკოტაშვილის შვილია, ფილმს „და ჩვენ ვიცეკვეთ“ წარმატებას უსურვებს.
„მინდა წარმატება ვუსურვო ამ ფილმს, Love is in the air. Good luck guys. აგრესია ხელს შეგვიშლის ყველაფერში და შევეცადოთ, რომ ერთმანეთს სული არ დავუბინძუროთ ნაგვის ყუთივით. Game of thrones არ მქონდა ნანახი და გუშინ პირდაპირ ეთერში ვნახე ყველა სერია, მგონი შევძლებთ მშვიდ ქვეყანაში ცხოვრებას, მიყვარხართ“, – წერს მუსიკოსი.
8 ნოემბერს ფილმის საპრემიერო ჩვენებას თბილისსა და ბათუმში არეულობა მოჰყვა, რა დროსაც პოლიციამ 25 ადამიანი დააკავა დედაქალაქში, სამი კი ბათუმში.
„და ჩვენ ვიცეკვეთ“ – ქართულ-შვედური ფილმია, რომელიც შვედეთმა „ოსკარის“ პრეტენდენტად დაასახელა. ფილმი არაერთი საერთაშორისო ჯილდოს მფლობელია. ფილმი მოგვითხრობს ახალგაზრდა მოცეკვავე მერაბის შესახებ, რომელიც რადიკალურად იცვლება მას შემდეგ, რაც თავისი ამბიციური მეტოქე ირაკლი შეუყვარდება.
ფილმის პრემიერა წელს კანის ფესტივალზე გაიმართა. ფილმი კინოფესტივალის Director's Fortnight-ში, ანუ 25 ფილმში მოხვდა და კანის კინოფესტივალის 10 საუკეთესო ფილმს შორის მეშვიდე ადგილზე გავიდა. ამერიკულმა ჟურნალმა W-მ 2019 წლის კანის კინოფესტივალის 15 ვარსკვლავი დაასახელა, რომელთა შორის ქართველი მსახიობი ლევან გელბახიანიც მოხვდა.
მთავარი როლის შემსრულებელი ლევან გელბახიანი კანის ფესტივალის „გამაოგნებლად ნიჭიერთა" ნუსხაში შეიყვანეს ისეთი მსახიობების გვერდით, როგორებიც არიან ანტონიო ბანდერასი, უილიამ დეფო, რობერტ პატინსონი.