თბილისი, 4 ოქტომბერი — Sputnik. თბილისის საქალაქო სასამართლომ ადვოკატი ნაირა ოტიაშვილი და მისი ორი კლიენტი – დედა და ქალიშვილი, რომლებსაც ცრუ დასმენაში ედებათ ბრალი, გირაოს სანაცვლოდ გაათავისუფლა.
პროკურორი თითოეული მათგანისთვის 3 ათასი ლარის ოდენობის გირაო შეფარდებას მოითხოვდა, თუმცა სასამართლომ თანხის 1 ათას ლარამდე შემცირება გადაწყვიტა.
ოტიაშვილისა და მისი კლიენტების ინტერესებს 16 ადვოკატი იცავს. მათ პროკურორის აცილება მოითხოვეს, მაგრამ აღნიშნული შუამდგომლობა არ დაკმაყოფილდა.
ოტიაშვილის დაკავების შესახებ ცნობილი სამშაბათს გახდა.
გამოძიების მონაცემებით, ოტიაშვილი იყო საქართველოს მოქალაქე ქალისა და მისი ქალიშვილის ადვოკატი ამ ქალის ვაჟის წინააღმდეგ საქმეში. დავის საგანი სასტუმრო იყო. დედამ ვაჟი შემაკავებელი ორდერის დარღვევაში დაადანაშაულა. ადვოკატმა კლიენტისა და მისი ქალიშვილის სიტყვები დაადასტურა.
ბრალის დამტკიცების შემთხვევაში ოტიაშვილსა და მის ორ კლიენტს ოთხიდან ექვს წლამდე ვადით თავისუფლების აღკვეთა ემუქრებათ.
