საქართველოში „ფორსაჟი 9“-ის ერთ-ერთი ეპიზოდის გადაღებები მიმდინარეობს. იმის მიუხედავად, რომ საქართველოში ფილმის მთავარი როლის შემსრულებლები არ იმყოფებიან და გადაღებებში დუბლიორები და კასკადიორები მონაწილეობენ, სოციალურ ქსელში ძალიან აქტუალურია ვინ დიზელის მემები, რომელიც ხან „მალინა, მალინამ!“ „შეაწუხა“, ხან თბილისის „საცობებმა“.
ვაჟა-ფშაველაზე მცხოვრები ერთ-ერთი ადგილობრივი „ფეისბუქზე“ წერს, რომ მთელი დღეა კორპუსების ეზოებში დადის მანქანა რუპორით და ადგილობრივებს ბოდიშს უხდის ხმაურის გამო: „1-წუთიანი კადრის გამო ხდება ეს ყველაფერი. შეგიძლიათ ჩამოხვიდეთ და გადაღებების პროცესს შეხედოთო, ეგეც გვითხრეს" – წერს ადგილობრივი.
„ფორსაჟის“ გადაღებებმა ქართველ ინტერნეტ-მომხმარებელს იუმორის უწყვეტი ნაკადი გაუხსნა. „ფეისბუქზე“ უამრავ სახალისო კომენტარს წააწყდებით ცნობილი ტრილერის გადაღებების შესახებ: დათო გორგილაძე: „ფორსაჟის“ ახალი სერიის ბოლოს ვინ დიზელი ისნის დაშლილებში იწყებს მუშაობას“.
„როგორ ხვდებიან ერთმანეთს „ფორსაჟის“ ახალ სერიაში ვინ დიზელისა და დუაინ ჯონსონის პერსონაჟები? ახლავე მოგახსენებთ.
ვინ დიზელს მანქანა ჰყავს მიჩერებული ვაჟაზე „მაკშაურმასთან". მანქანაში ზის, მაგრამ მაიონეზი რო არ დაეწუწოს, ფეხები გარეთ, ასფალტზე უდგას. მიდის დუაინ ჯონსონი. ბორბალს ფეხს მიადებს, ოდნავ შეარყევს და ეკითხება: - რა სტკივა ეხლა ამას?“ - წერს დათო გორგილაძე.
სანდრო რაჩკოვსკი: „მთავარი „ვილანი“ ყვითელ მარშუტკაზე ზის და მაგას მისდევს ვინ დიზელი. ფილმის სიუჟეტი ეგაა, უნდა დაეწიოს და მუქარით ჩაართვევინოს კონდიციონერი“.
თბილისში „ფორსაჟი 9”-ის გადაღებები პროგრამის „გადაიღე საქართველოში“ ფარგლებში დაიწყო. ჰოლივუდის კინომწარმოებელი კომპანიის UNIVERSAl PICTURES ერთ-ერთი ყველაზე პოპულარული ფილმის ეპიზოდების გადაღება 18 აგვისტოს დაიწყო და 20 სექტემბრამდე გასტანს.
გადაღებებისთვის საქართველოს ორასამდე ჰოლივუდელი სტუმარი ეწვია. გადამღები ჯგუფი სულ 600 ადამიანისგან შედგება, მათ შორის 425 ადგილობრივი პერსონალია. ამასთან ჩამოყვანილია სპეცტექნიკა, მათ შორის სპეცტრაილერი, რომელიც, ფილმის სიუჟეტის თანახმად, ბეთანიაში დიდი სიმაღლიდან გადავარდება.
როგორც ცნობილია, თბილისში „ფორსაჟი 9“-ის 10-წუთიან მონაკვეთს გადაიღებენ. რაც შეეხება ბიუჯეტს, თბილისში გადაღებებზე 32 მლნ ლარი დაიხარჯება.
გადაღებებისთვის შერჩეულია ლოკაციები თბილისსა და რუსთავში, კერძოდ, გადაღებები განხორციელდება რუსთაველისა და ვაჟა-ფშაველას გამზირებზე, თავისუფლების მოედანზე, პუშკინის, ბესარიონ ჟღენტის, ავთო ვარაზისა და უნივერსიტეტის ქუჩებზე, ასევე რუსთავში, ბაზრობის ტერიტორიაზე.
საქართველოს კინოთეატრებში კვენტინ ტარანტინოს ახალი ფილმის პრემიერა გაიმართება >>>
სააგენტოს „აწარმოე საქართველოში“ ინფორმაციით, გადაღების მასშტაბისა და ინვესტიციის მოცულობიდან გამომდინარე, აღნიშნული პროექტი უპრეცედენტოა სახელმწიფო პროგრამის „გადაიღე საქართველოში“ არსებობის ისტორიაში.
„ფორსაჟი“ (The Fast and Furious) არის ამერიკული კინო-ფრენჩაიზი, რომელიც ამჟამად შედგება რვა სრულმეტრაჟიანი და ორი მოკლემეტრაჟიანი ფილმისგან. ფილმები გამოდიოდა 2001 წლიდან 2017 წლამდე.