თბილისი, 26 ივლისი – Sputnik. დღეს ტელეკომპანია „რუსთავი 2“-ის ჟურნალისტ გიორგი სანაიას მკვლელობიდან 18 წელი შესრულდა.
სოციალურ ქსელში მისი ძმა, ასევე ჟურნალისტი ვახო სანაია გარდაცვლილის ფოტოს აქვეყნებს.
საზარელი მკვლელობა ყანდაურაში: დაკავებულ 85 წლის მამაკაცს მკვლელობას აღარ ედავებიან >>>
აღნიშნულ საქმეზე გამოძიება ორი წლის განმავლობაში მიმდინარეობდა. 2003 წლის 9 ივლისს სასამართლომ მკვლელობაში დამნაშავედ შსს-ს ყოფილი თანამშრომელი, 32 წლის გრიგოლ ხურცილავა ცნო და მას 13 წლით თავისუფლების აღკვეთა მიუსაჯა. მკვლელობის ოფიციალურ მიზეზად კი პირადი მოტივი დასახელდა.
2004 წლის დეკემბერში საქართველოს უზენაესი სასამართლოს საკასაციო პალატამ არ დააკმაყოფილა სანაიას მეუღლის ხათუნა ჩხაიძის მოთხოვნა, რომელიც მეუღლის მკვლელობის საქმის ხელახლა გამოძიებას მოითხოვდა. ხათუნა ჩხაიძეს მიაჩნდა, რომ გამოძიება საპროცესო ნორმების დარღვევით წარიმართა.
სასამართლომ ასევე არ დააკმაყოფილა გრიგოლ ხურცილავას ადვოკატის დავით დადიანის მოთხოვნაც დაცვის ქვეშ მყოფისთვის განაჩენის შემსუბუქების შესახებ.
დავით დადიანის მტკიცებით, გრიგოლ ხურცილავამ დანაშაული აფექტის მდგომარეობაში ჩაიდინა.
საშუალო სკოლის დამთავრების შემდეგ გიორგი სანაია სწავლობდა თბილისის სახელმწიფო უნივერსიტეტის ჟურნალისტიკის ფაკულტეტზე. 17 წლის ასაკში ის კორესპონდენტად წავიდა აფხაზეთის ომში. უკვე სტუდენტობის პერიოდში მუშაობდა სხვადასხვა ჟურნალ-გაზეთებში. მოგვიანებით მან მუშაობა დაიწყო ტელესამაუწყებლო კომპანია „რუსთავი 2“-ში. ამ არხზე გიორგი სანაიას მიჰყავდა იმ დროისათვის ყველაზე პოპულარული თოქ-შოუ "ღამის კურიერი".