თბილისი, 26 ივლისი – Sputnik. პარლამენტში „რუსთავი2“-ის დამფუძნებლებს დავით დვალსა და ჯარჯი აქიმიძეს მოუსმენენ, ინფორმაცია საქართველოს პარლამენტის ოფიციალურ გვერდზეა გამოქვეყნებული.
აქიმიძე და დვალი პარლამენტში 13:00 საათზე მივლენ და დამოუკიდებელ დეპუტატებს ლევან კობერიძეს, ლევან გოგიჩაიშვილს, კობა ნარჩემაშვილსა და გედევან ფოფხაძეს შეხვდებიან. შეხვედრას ოპოზიციის წევრებიც დაესწრებიან.
მას შემდეგ, რაც 18 ივლისს სტრასბურგის სასამართლომ არ დააკმაყოფილა „რუსთავი 2“-ის სარჩელი და საქართველოს უზენაესი სასამართლოს მიერ 2017 წელს მიღებული გადაწყვეტილების საფუძველზე ტელეკომპანიის მფლობელი კვლავ ბიზნესმენი ქიბარ ხალვაში გახდა, დავით დვალმა და ჯარჯი აქიმიძემ კიდევ ერთხელ განაცხადეს, რომ „რუსთავი 2“-ის საქმეზე სამართლიანობა აღდგება მხოლოდ მაშინ, როცა ძალით წართმეული ტელეკომპანია მის დამფუძნებლებს დაუბრუნდება.