თბილისი, 30 ივნისი — Sputnik. ნატა ზვიადაძის არტ–ფოტოპროექტს სახელწოდებით #CHERNOBYL, რომელიც ჩერნობილის ტრაგედიის 33 წლისთავს ეძღვნება, თბილისის არტ–ცენტრში Fabrika 3 ივლისს გამოფენენ.
ფოტოები, რომელსაც პუბლიკა გამოფენაზე იხილავს, შექმნილია 2919 წლის თებერვალში ჩერნობილის გაუცხოების ზონაში ხუთდღიანი ექსპედიციის ფარგლებში ავტორის ყოფნის დროს.
აღნიშნული ფოტოპროექტი 2019 წლის 26 აპრილსი კიევში იყო წარდგენილი, სადაც ზვიადაძემ საერთაშორისო კონკურსზე ოქროს მედალი მოიპოვა.
ნატა ზვიადაძე უკრაინის ფოტოგრაფების კავშირისა და საქართველოს ფოტოგრაფების ასოციაციის წევრია, ასევე არის მრავალი საერთაშორისო ფოტოკონკურსის ლაურეატი. მას ხშირად იწვევენ სხვადასხვა კონკურსზე ჟიურის წევრად. მისი ნამუშევრები გამოიფინა პარიზში, ტრიესტეში, კიევსა და როვნოში, აზერბაიჯანსა და თბილისში.
ძირითადი მიმართულებები, რომლებშიც მხატვარი მუშაობს, არტი, სტრიტ–არტი და ფერადი ნატიურმორტებია.
გამოფენაზე დასწრება თავისუფალია. მისამართი – თბილისი, ეგნატე ნინოშვილის №8.
1986 წლის 26 აპრილს ჩერნობილის ატომური ელექტროსადგურის რეაქტორზე აფეთქება მოხდა, რის შედეგადაც რადიოაქტიური ნივთიერებები ატმოსფეროში გაიფანტა და მომწამვლელი ღრუბელი დასავლეთ რუსეთის, ბელორუსის, უკრაინისა და ევროპის თავზე გაიფანტა.
ჩერნობილის კატასტროფა 2011 წლის 11 მარტამდე, ფუკუშიმას ატომური რეაქტორის კატასტროფამდე, ერთადერთი მოვლენა იყო, რომელიც საერთაშორისო ატომურ შკალაზე მეშვიდე დონეს უტოლდებოდა.
უშუალოდ კატასტროფის შედეგად დაიღუპა 31 ადამიანი, ხოლო რადიოაქტიური მოწამვლის შედეგად წარმოქმნილი დაავადებები დღემდე აწუხებთ ქალაქ პრიპიატისა და მის შემოგარენში მცხოვრებ ადამიანებს.
