თბილისი, 27 მარტი — Sputnik. ეკოტოქსიკოლოგი, გაეროს ექსპერტი ხათუნა ახალაია მშობლებს არ ურჩევს თავის შვილებს ახალი კარტოფილი აჭამონ, რადგან ის ქიმიურ ნივთიერებებს შეიძლება შეიცავდეს.
საქართველოში კარტოფილის მოყვანის ვადები ხშირად ირღვევა, განაცხადა ახალაიამ.
„ახალი კარტოფილის დათესვის წინ, ფერმერები იყენებენ გლიფოსატს, რომელიც ნიადაგიდან აუცილებლად გადავა კარტოფილში. ამ ნივთიერების დაშლის პერიოდი არის 60 დღე, ეს პერიოდი უნდა გავიდეს კარტოფილის დათესვიდან, რომ გლიფოსატმა დაშლა დაიწყოს და შესაბამისად არ მოხვდეს პროდუქციაში. ეს სწორედ ის პერიოდია, როცა კარტოფილი ქერქს იკეთებს“, - განაცხადა ხათუნა ახალაიამ პრესკონფერენციაზე.
საქართველოში პროდუქტებში გლიფოსატზე კვლევა ჯერ არ ჩატარებულა და შესაბამისი მონაცემებიც არ არსებობს, აღნიშნა მან.
რაც შეეხება ნიტრიტებსა და ნიტრატებს, გასულ წელს სურსათის ეროვნული სააგენტოს სპეციალისტების მიერ ჩატარებული კვლევებით დადასტურდა, რომ ამ ნივთიერებებს დიდი რაოდენობით შეიცავს ბოსტნეული და მწვანილი, რომელიც საქართველოში დახლებზე იყიდება.
ახალი კარტოფილი მალე მაღაზიებსა და ბაზრებში გამოჩნდება, თუმცა სპეციალისტები გვირჩევენ, რომ აპრილის ბოლომდე-მაისის დასაწყისამდე ამ პროდუქტისგან თავი შევიკავოთ.
