თბილისი, 19 სექტემბერი — Sputnik. საგანგებო სიტუაციების მართვის სამსახურში მეხანძრე-მაშველის 90 ვაკანტურ პოზიციაზე 650 განაცხადი შევიდა, იუწყება საგანგებო სიტუაციების მართვის სამსახური.
საგანგებო სიტუაციების მართვის სამსახურში მეხანძრე- მაშველის ვაკანტურ პოზიციებზე განაცხადების მიღება დასრულდა.
კონკურსანტები, რომლებიც აკმაყოფილებენ დადგენილ მოთხოვნებს, მეორე ტურში ჩააბარებენ ფიზიკური მომზადების ნორმატივებს.
ფიზიკური ნორმატივები ცხრილში მოცემულია 5 ასაკობრივი ჯგუფის მიხედვით. მათი ჩაბარების თარიღს კი უწყება უახლოეს დღეებში გამოაცხადებს.
ამჟამად მეხანძრეებისა და მაშველების მინიმალური ხელფასი 750 ლარს შეადგენს. მთავრობის განკარგულების თანახმად, რომელიც მიმდინარე წლის 9 აგვისტოს გამოქვეყნდა, მეხანძრეებისა და მაშველების ყოველთვიურმა ხელფასმა 1200 ლარამდე უნდა შეადგინოს, მისი ოდენობა წოდებასა და მუშაობის სტაჟზე იქნება დამოკიდებული.
