თბილისი, 10 ნოემბერი — Sputnik. გასტრონომიულ ფესტივალზე Food Show 2017 ქართული ნაციონალური სამზარეულოს ნიმუშებს მოსკოვის „სოკოლნიკის" პარკის საკონგრესო-საგამოფენო ცენტრში 2-3 დეკემბერს წარმოადგენენ, იუწყებიან ღონისძიების ორგანიზატორები.
ფესტივალის მთავარი მოვლენაა მასშტაბური კულინარიული მასტერ-კლასები, სადაც სხვადასხვა რესტორნის ასობით წარმომადგენელი ერთდროულად მოამზადებს კერძებს.
თითოეული მასტერ-კლასი მსოფლიოს გარკვეულ სამზარეულოს მიეძღვნება. სულ დაგეგმილია ათ-ათი კერძის გამოფენა რუსეთიდან, საქართველოდან, სომხეთიდან, საფრანგეთიდან, იაპონიიდან, ტაილანდიდან, იტალიიდან, პერუდან, შოტლანდიიდან და სან-მარინოდან.
ქართული სამზარეულო წარმოდგენილი იქნება აჯაფსანდალით, სამი სახეობის ფხალეულის ასორტით და ქართული შოთის პურით, რომელსაც რესტორან Vani-ს შეფ-მზარეული მოამზადებს.
ფესტივალი ორი დღის განმავლობაში ლაუნჯის, დისკოს, ჯაზისა და თანამედროვე შემსრულებლების მუსიკის ფონზე ჩატარდება. პროგრამაში ასევე იქნება გასართობი და შემეცნებითი შოუ, კინოჩვენებები, ლატარეა და კონკურსები.
ამასთან ერთად, Food Show-ზე დაინტერესებულ პირებს მოუთხრობენ, თუ როგორ გახდნენ ფუდ-ბლოგერი, ფუდ-სტილისტი ან რესტორატორი, ასევე, როგორ ისწავლონ გადაღება და სად შეისწავლონ მზარეულის ან სომელიეს პროფესია.
ორგანიზატორები ყველაზე პატარა სტუმრებისთვის სპეციალურ პროგრამას ამზადებენ: ბავშვები შეძლებენ სათამაშო ზონაში ანიმატორებთან ერთად გართობას. მოზარდებისთვის კულინარიული სტუდია გაიხსნება, სადაც შესაძლებელი იქნება თავად მოამზადონ მაფინები, მარშმელოუსგან პატარა ტორტები, ასევე კანფეტებისგან შეკრან ბუკეტი და ა.შ.
ფესტივალის ფინალური მოვლენა Food Show Awards 2017-ის პირველი ნაციონალური პრემიის დაჯილდოების ცერემონია იქნება. ნომინანტებს შორის არიან: სატელევიზიო შოუ, რადიოგადაცემები, ჟურნალები, ბლოგები, პორტალები, ფუდ-ფოტოგრაფები, ფუდ-ბლოგერები, გასტრონომიული სფეროს ჟურნალისტები და კულინარიის შესახებ მოწინავე გადაცემები.
ღონისძიებაზე დასწრება, რომელიც 2-3 დეკემბერს 11:00-დან 19:00 საათამდე გაგრძელდება, შესაძლებელია უფასო წინასწარი რეგისტრაციით (https://foodshow.ru/free).
