თბილისი, 2 ნოემბერი — Sputnik. ჰოლივუდის კინოვარსკვლავმა ნიკოლ კიდმანმა BALENCIAGA-ს სამოსსა და pantashoes-ში ფოტოსესია მოაწყო ჟურნალ Glamour-სთვის, რომელმაც ის შეიყვანა სიაში „წლის ქალი“. BALENCIAGA-ს კრეატიული დირექტორი ქართველი დიზაინერი დემნა გვასალიაა.
„მომწონს ეს შესანიშნავი ნივთები BALENCIAGA-სგან", — დაწერა Facebook-გვერდზე 50 წლის კიდმანმა.
Pantashoes — ესაა ფეხსაცმელიცა და შარვალიც ერთდროულად, რომელიც გვასალიამ შექმნა და ის ნამდვილი ჰიტი გახდა.
წელს გვასალია „ამერიკის მოდის დიზაინერების საბჭოს“ (CFDA) პრემიის, „მოდის ოსკარის" მფლობელი გახდა. დაჯილდოების ცერემონია გაიმართა ნიუ-იორკში, სადაც გვასალიას „საუკეთესო უცხოელი დიზაინერი უწოდეს".
დემნა გვასალია მოდის სამყაროში დიდი ხანია მოღვაწეობს. ქართველი დიზაინერი ნატიფი ხელოვნების ანტვერპენის სამეფო აკადემიის (Royal Academy of Fine Arts (Antwerp) კურსდამთავრებულია. 2009 წლიდან მუშაობდა ფრანგულ მოდის სახლ Maison Margiela-ში, სადაც ქალის კოლექციებს ქმნიდა. 2013 წლიდან კი Louis Vuitton-ში გადავიდა.
გვასალია 2016 წლის ოქტომბერში მსოფლიოში ცნობილი მოდის სახლის Balenciaga-ს კრეატიული დირექტორი გახდა. მან ამერიკელი დიზაინერი ალექსანდრ ვონგი შეცვალა, რომელმაც Balenciaga-ს კრეატიული დირექტორის თანამდებობაზე ორ წელზე მეტი იმუშავა. დემნა ასევე პოპულარული ბრენდის Vetements-ის ერთ-ერთი დამაარსებელიცაა.
