თბილისი, 13 აგვისტო – Sputnik. საქართველოს თავდაცვის მინისტრი ლევან იზორია ავღანეთში გაემგზავრება, რათა 23-ე ბატალიონის სამხედრო მოსამსახურეებს უმცროსი სერჟანტის, მდინარი ბებიაშვილის დაღუპვა პირადად მიუსამძიმროს, რომელიც „მტკიცე მხარდაჭერის“ (Resolute Support) მისიაში მონაწილეობდა, იუწყება საზოგადოებრივი მაუწყებლის პირველი არხი.
უმცროსი სერჟანტი ბებიაშვილი ავღანეთში, ბაგრამის საავიაციო ბაზის მიმდებარე ტერიტორიაზე ერთობლივი მოტორიზებული პატრულირებისას 4 აგვისტოს განხორციელებული თავდასხმის შედეგად დაიღუპა.
თავდასხმის შედეგად კიდევ სამი სამხედრო დაიჭრა.
საქართველოს შეიარაღებული ძალების 23-ე ბატალიონის სამხედრო მოსამსახურეებთან შეხვედრის შემდეგ იზორია გერმანიაში გაემგზავრება, სადაც დაჭრილ სამხედროებს მოინახულებს.
მისია „მტკიცე მხარდაჭერა“, რომელიც 2015 წლის 1 იანვრიდან დაიწყო, არასაბრძოლო ხასიათისაა. ნატოს ჯარისკაცებს შეუძლიათ შეტევის მოგერიება, მაგრამ ისინი არ მონაწილეობენ ავღანეთის უშიშროების ძალებთან ერთად საბრძოლო მოქმედებებში. მისიაში საქართველოდან 870 სამხედრო მონაწილეობს.
