თბილისი, 2 მაისი — Sputnik. უახლოეს პერიოდში თითოეულ რაიონულ ცენტრში სპორტკომპლექსი აშენდება, განაცხადა საქართველოს ინფრასტრუქტურისა და რეგიონული განვითარების მინისტრმა ზურაბ ალავიძემ პარლამენტში.
მასობრივი სპორტის განვითარების პროგრამა საქართველოს მთავრობის 2016-2020 წლების სამოქმედო პროგრამის ერთ-ერთი პრიორიტეტია, რომელიც სპორტულ ღონისძიებებში ახალგაზრდების აქტიურ ჩართულობასა და ჯანსაღი ცხოვრების წესის დანერგვას ითვალისწინებს.
„ჩვენ უახლოეს პერიოდში თითოეული მუნიციპალიტეტის ცენტრში სპორტკომპლექსის მშენებლობას ვგეგმავთ. ვამზადებთ პროგრამას, რომელიც 2-3 თვეში მზად იქნება და ამის შემდეგ დავიწყებთ მის განხორციელებას. ეს უახლოეს დროში მოხდება", — განაცხადა ალავიძემ.
საქართველოს მთავრობა გეგმავს დიდი ყურადღება მიაქციოს ქვეყანაში სპორტის განვითარებას, რათა ახალგაზრდების 25% ჩართული იყოს მასობრივ, ხოლო 15% პროფესიონალურ სპორტში. გარდა ამისა, დიდი ყურადღება დაეთმობა ფეხბურთისა და რაგბის განვითარებას. ასევე იგეგმება სპორტული ტურიზმის განვითარება.
დღევანდელი მდგომარეობით, სპორტკომპლექსები და დიდი სტადიონები საქართველოს მხოლოდ რამდენიმე ქალაქშია.
