თბილისი, 16 იანვარი — Sputnik. საქართველოში სტარტს იღებს ახალი პროექტი „ჯანსაღი თაობა“, განაცხადა საქართველოს პრემიერ-მინისტრმა გიორგი კვირიკაშვილმა ისნის რაიონში №103 სკოლის ახალი შენობის გახსნისას.
სკოლის ძველი, ავარიული შენობა სამი წლის წინ დაანგრიეს, რის გამოც მოსწავლეები იძულებული იყვნენ დროებით ვაზისუბნის რაიონში ერთ-ერთ სკოლაში გაეგრძელებინათ სწავლა.
„ეს სკოლა თანამედროვე სტანდარტების შესაბამისად აშენდა და მიხარია, რომ მას დღეს თქვენთან ერთად ვხსნი. მნიშვნელოვანია აღინიშნოს, რომ ეს სკოლა არის მთლიანად ადაპტირებული შეზღუდული შესაძლებლობების ბავშვებისთვისაც“, — განაცხადა კვირიკაშვილმა.
პროექტი „ჯანსაღი თაობა“, რომელიც მოსწავლეებს შორის ფიზიკური აქტივობის განვითარებას ითვალისწინებს, ქვეყნის ყველა სკოლაში საქართველოს განათლებისა და სპორტის სამინისტროების თანამშრომლობის საფუძველზე განხორციელდება. პროექტი სათავეს სწორედ 103-ე სკოლიდან აიღებს.
განათლებისა და მეცნიერების მინისტრმა ალექსანდრე ჯეჯელავამ აღნიშნა, რომ უწყებამ უკვე ააშენა ათი ახალი სკოლა და ამ მიმართულებით მუშაობა აქტიურად გრძელდება.