თბილისი, 26 ნოებერი — Sputnik. საქართველოს პირველმა ქალბატონმა ქალთა მიმართ ძალადობის აღმოფხვრის საერთაშორისო დღისადმი მიძღვნილ დოკუმენტურ სპექტაკლში „შვიდი“ მიიღო მონაწილეობა, ეს პიესების კრებული გახლავთ ქალთა უფლებების შესახებ, იუწყება საქართველოს პრეზიდენტის ადმინისტრაციის პრესსამსახური.
„დღევანდელი პიესის კითხვა ეძღვნება ქალთა მიმართ ძალადობის წინააღმდეგ ბრძოლას. პერსონაჟები არიან ის ქალები, რომლებმაც თავი დააღწიეს ამ მძიმე ხვედრს. ქალები სხვადასხვა ქვეყნებიდან, რომლებიც შემდეგ თავად გახდნენ მებრძოლები სხვა ქალების დასახმარებლად და რომლებსაც საკმაოდ ეფექტურად გამოუვიდათ ეს საქმე“, — აღნიშნა მაკა ჩიჩუამ.
მისი თქმით, ეს არაჩვეულებრივი ქალები იყვნენ, „რომელთა გამომეტყველებაც კი ძალიან კარგად ასახავს იმ მდგომარეობას საიდანაც ისინი გამოვიდნენ“.
სპექტაკლი კოტე მარჯანიშვილის სახელობის სახელმწიფო დრამატულ თეატრში გაიმართა და მასში მონაწილეობა საქართველოს პირველი ქალბატონის გარდა, სხვადასხვა სფეროში მოღვაწე ცნობილმა ქალბატონებმაც მიიღეს.
პროექტის ორგანიზატორები არიან არასამთავრობო ორგანიზაცია „ქალთა ფონდი საქართველოში“, შვედეთის ინსტიტუტი და შვედეთის სამეფოს საელჩო საქართველოში.
