Roma Fashion Week 3–7 აპრილს ჩატარდება. მოდის სამყაროში ეს მნიშვნელოვანი მოვლენა და ინტერნაციონალური მოედანია, სადაც უკვე ცნობილი სტილისტები და დიზაინერები თავის ბოლო ქმნილებებს წარადგენენ. ამავდროულად, მოდის სამყაროს ახალგაზრდა ნიჭიერი პროფესიონალებისთვის ეს თავისი სიტყვის თქმისა და ცნობილი კუტიურიეებისგან შეფასების მიღების საშულებაცაა.
მსოფლიოს მოდის ერთ-ერთ ყველაზე პრესტიჟულ ღონისძიებაზე საქართველოს 16 ადამიანი წარადგენს, მათ შორის ვიზაჟისტი ალექს ალექსანიანი, აქსესუარების დიზაინერი მარი ეფეჯიანი, სამოსის დიზაინერი ხატი უფო.
მოდელები კატეგორიაში 14–დან 25 წლამდე — ზიზი ცქვიტარია, ანანო შაბურიშვილი, ლიზი დგებუაძე.
ასაკობრივ კატეგორიაში 7–დან 13 წლამდე საქართველოს წარმოადგენენ ახალგაზრდა მოდელები მარიამ შარაშიძე, ანასტასია გოგოლაძე და სალომე ბერიძე.
ფოტომოდელები ცალკეულ კატეგორიაში მოხვდნენ. 14-დან 28 წლამდე ასაკობრივ კატეგორიაში საქართველოს წარმოადგენენ თაკო ჩხეიძე, მარიამ ტოტიევა, მარი სურმავა. 7-დან 13 წლამდე კატეგორიაში კი — შაზო ქუთასი, მეგი ინწკირველი და თიკო ლაგვილავა.
ნიკოლოზ პაპიძე ერთადერთი ბიჭია, რომელიც საქართველოს სახელით 7-დან 13 წლამდე მოდელების კატეგორიაში RFW-ზე მონაწილეობას მიიღებს.
„ყველა მათგანი საქართველოს სახელით წარდგება მოდის იტალიურ კვირეულზე. ისინი საუკეთესო მოდელის, დიზაინერის, ვიზაჟისტის, სტილისტის წოდებისთვის იბრძოლებენ. ამ ღონისძიების შემდეგ მოდელებს აქვთ შანსი მოხვდნენ მილანისა და ლონდონის მოდის კვირეულზე“, — განუცხადა „Sputnik–საქართველოს“ ოგანმა.
ღონისძიების საუკეთესო მონაწილეები პრესტიჟულ ჯილდოებს მიიღებენ. კერძოდ, საუკეთესო მოდელები საშუალებას მიიღებენ გაიარონ კურსები რომში Cordella International Fashion School-ის ინსტიტუტში, ასევე პრესტიჟულ სამოდელო სააგენტოებთან და ჟურნალებთან კონტრაქტების გაფორმების შანსს მიიღებენ.
იტალიური მოდის კვირეულზე პირველი ადგილის მფლობელი მოდელი იტალიურ სამოდელო სააგენტო Gierre Models Management-თან ერთწლიან კონტრაქტს მიიღებს, მეორე და მესამე ადგილების მფლობელები კი Roma Fashion Week-ის აკადემიაში სტაჟირებას გაივლიან. საუკეთესო ვიზაჟისტი რომში Gilmont-ის აკადემიაში სტაჟირებას გაივლის.
„პერსპექტივები ძალიან დიდია. იტალიამ ასეთ პრესტიჟულ ღონისძიებაზე საქართველოს წარმოდგენის ექსკლუზიური უფლება მოგვცა. დიდი დროის განმავლობაში ვუკავშირდებოდი მათ, ვუყვებოდი საქართველოს შესახებ, იმის შესახებ, რომ სამოდელო ბიზნესისა და ბიუტი–სფეროში ძალიან ნიჭიერი ადამიანები გვყავს. მოგვიწია მტკიცება, ანგარიშების წარდგენა, რათა მონაწილე ქვეყნების სიაში საქართველოც შეეყვანათ, და მათ შანსი მოგვცეს. სერიოზულად უნდა მოვემზადოთ, რათა აპრილში საქართველო ღირსეულად წარმოვაჩინოთ“, — აღნიშნა ოგანმა.
ღონისძიებას გააშუქებს Fashion TV Italy, TV Moda, ჟურნალი Fashion Time და მრავალი სხვა.
„ჟიურის წევრები მოდის მსოფლიო ვარსკვლავები იქნებიან. წელს მოსამზადებლად ცოტა დრო გვქონდა. ეს ღონისძიება შანსს აძლევს ფოტოგრაფებს, რომლებიც მოდის ინდუსტრიასთან არიან დაკავშირებული და ოპერატორებს, რომლებიც ვიდეორგოლებს იღებენ. ვიმედოვნებ, რომ მომავალ წელს ისინიც შემოგვიერთდებიან“, — დასასრულს აღნიშნა ოგანმა.
