ნათია ფანჯიკიძე: ზედმეტად ზრდილობიანი ბავშვი ძალადობის მსხვერპლია
„ბავშვები ბუნებრივად ზრდილობიანები არ არიან, საკმაოდ მორცხვები კი არიან. შეიძლება ნებისმიერმა თქვენგანმა გაიხსენოს, როგორ გრცხვენოდათ, როცა უფროსები მოვიდოდნენ სტუმრად და თქვენ გეუბნებოდნენ: მიესალმე! როგორ გასაჭირში ვარდებოდით ამ დროს. ჯანსაღი ბავშვი, რომელსაც ფსიქიკური პრობლემები არ აქვს, ჯერ გარშემო უვლის ახალ სტუმარს, მისთვის ნაკლებად ნაცნობ ადამიანს და მხოლოდ მაშინ, როცა მოეწონება და უსაფრთხოდ ჩათვლის ამ ადამიანს, მერე გამოაქვს ხან მისი სათამაშო, ხან ნახატი და ამგვარად ამყარებს კონტაქტს უფროს ადამიანთან“, – ამბობს ნათია ფანჯიკიძე სატელევიზიო გადაცემაში.
ფსიქოლოგი აღნიშნავს: „როცა ბავშვს წყალი დაექცა, მას შენიშვნა მივეცით არასწორი მოძრაობის გამო, არადა, მცირეწლოვან ასაკში მოტორიკას ავითარებს ბავშვი. ამის გამო ხან რაღაც გაუტყდება და ხან დაექცევა. რაც მუდმივად აძლევთ ბავშვს შენიშვნას ახალ გარემოში, მით უფრო მეტი შფოთვა ექნება“.
