სავარაუდოდ, ამით სამყაროს ვერ გავაკვირვებთ და, ჩემი აზრით, არც არის საჭირო. დღეს, მაგალითად, ასეთი აღმოჩენა გავაკეთე – დილაბნელზე ჩემი სახლის ფანჯრიდან რომ გამოვიხედე, მივხვდი, რომ არც ერთი დილა ერთმანეთს არ ჰგავს. თითქოს ხედი არ იცვლება, მაგრამ სამაგიეროდ იცვლება ადამიანის დამოკიდებულება დანახულის მიმართ.
ვინ მოთვლის რამდენჯერ გათენებია კაცობრიობას დღევანდელი 12 ივლისი და რამდენი რამ მომხდარა გასულ საუკუნეებში. საეკლესიო კალენდრით წმინდა მოციქულების პეტრესა და პავლეს სახელობის დღეა, რაღაც გაურკვეველი კალენდარი კი მამცნობს, ავსტრალიაში აბორიგენები ზეიმობენო, აქეთ ცენტრალურ აფრიკაში პაწაწუნა სახელმწიფო სან ტომე და პრინსიპა დამოუკიდებლობის დღეს აღნიშნავს, თუმცა, ამწუთიერი განწყობიდან გამომდინარე, უფრო მეტად დამაინტერესა ერთმა ცნობამ — დღეს, 12 ივლისს ფოტოგრაფიის დღე ყოფილა და, თუ შემომიერთდებით, ეს დილა ამ საინტერესო პროფესიას მივუძღვნათ.
ფრანგი კინორეჟისორი ჟან ლიუკ გოდარი ასე ახასიათებს ფოტოგრაფიას – ფოტოგრაფია რეალობის ანარეკლი კი არ არის, არამედ ამ ანარეკლის რეალობააო. ალბათ ამიტომაც მომეჩვენა ჩემი ფანჯრიდან დანახული განსხვავებული ანარეკლის რეალობად…
თანამედროვე ტექნიკის „გადამკიდე“, ყოველი მეორე ადამიანი ფოტოგრაფია, მაგრამ არა ფოტოხელოვანი. იმისთვის, რომ ხელოვნების ნიმუში მიიღოთ, აუცილებელია საჭირო ადგილზე აღმოჩნდეთ საჭირო დროს და საჭირო განათების შემთხვევაში საჭირო კუთხით მიმართოთ თქვენი ფოტოაპარატი, ამას დაამატეთ ამ საქმიანობისთვის საჭირო ნიჭი და შედევრიც შექმნილია. მაინც როგორ გავარკვიოთ კარგია ფოტო თუ არა? მოდით, პატარა ექსპერიმენტი ჩავატაროთ: გთავაზობთ ერთ ფოტოს – კარგია ის თუ ცუდი?
რა თქმა უნდა, თქვენ პასუხს ვერ გავიგებ, მაგრამ ჩავთვალოთ, რომ დამეთანხმეთ. ახლა ცოტა შევცვლი კითხვას – რამდენად კარგია ფოტო პროფესიონალი ექიმი-რენტგენოლოგისთვის? ჩემი და თქვენი პასუხი უარყოფითია – ძვლები ხომ არ ჩანს!
კიდევ შევცვალოთ კითხვა — ივარგებს ეს ფოტო მობილური ტელეფონის რეკლამირებისთვის? რა თქმა უნდა, არა. მაშ რატომ არის ეს ფოტო კარგი? ალბათ იმიტომ, რომ აქ არის ის მთავარი, რასაც ფოტოგრაფიისგან ველით – ე მ ო ც ი ა. ბუნებამ ადამიანში ჩადო ემოციის მიღებისა და გაცემის საოცარი უნარი, ამის გარეშე ადამიანი ვერ იცხოვრებს. აქედან დასკვნა: კარგია ის ფოტო, რომელიც ემოციას გადმოსცემს.
გეთანხმებით, ეს ჩემი მოსაზრება სუბიექტურია, მაგრამ მე ასე აღვიქვამ, ისევე, როგორც დღევანდელ დილას, რომელიც საოცრად არაზაფხულისეული მეჩვენება. თქვენ, შესაძლოა, სულ სხვანაირად დაინახოთ და აღიქვათ ჩემი ფანჯრიდან დანახული. ერთ რამეში კი ალბათ ყველა დამეთანხმებით: არც ერთი დილა ერთმანეთს არ ჰგავს. თუ ასეა, გილოცავთ განსაკუთრებული და ძალიან არაზაფხულიანი დილის გათენებას!