თბილისი, 22 ივნისი — Sputnik. საქართველოს პრეზიდენტი სალომე ზურაბიშვილი 23 ივნისს ვიზიტით უკრაინას ეწვევა, იუწყება პრეზიდენტის ადმინისტრაციის პრეს–სამსახური.
ვიზიტის ფარგლებში დაგეგმილია საქართველოს პრეზიდენტის შეხვედრა უკრაინის პრეზიდენტ ვლადიმირ ზელენსკისთან. შეხვედრები პირისპირ და გაფართოებულ ფორმატში გაიმართება.
გარდა ამისა, პრეზიდენტი შეხვედრებს გამართავს უკრაინის პრემიერ–მინისტრ დენის შმიგალთან და უკრაინის ეროვნული რადას თავმჯდომარე დმიტრო რაზუმკოვთან.
საქართველოს პრეზიდენტი უკრაინას სახელმწიფო დელეგაციასთან ერთად ეწვევა, რომლის შემადგენლობაშიც პრეზიდენტის ადმინისტრაციის, საკანონმდებლო და აღმასრულებელი ხელისუფლების წარმომადგენლები შედიან.
ეს საქართველოს სახელმწიფო მეთაურის მეორე ვიზიტი იქნება კიევში. 2019 წლის მაისში ზურაბიშვილი უკრაინის პრეზიდენტ ზელენსკის ინაუგურაციის ცერემონიას ესწრებოდა. საქართველოს პრეზიდენტი პირველი უცხოელი ლიდერი იყო, ვისთანაც უკრაინის ახალმა პრეზიდენტმა მოლაპარაკებები გამართა.
საქართველომ და უკრაინამ დიპლომატიური ურთიერთობები 1992 წლის ივლისში დაამყარეს. იმ დროიდან ქვეყნებს შორის 105 ორმხრივი და მრავალმხრივი შეთანხმება გაფორმდა. ქვეყნებს შორის თავისუფალი ვაჭრობის რეჟიმი მოქმედებს.
