თბილისი, 20 ივნისი — Sputnik. საქართველოს პრეზიდენტმა სალომე ზურაბიშვილმა ანტონიუ გუტერეშს გაეროს გენერალურ მდივნად მეორე ვადით დანიშვნა მიულოცა. ამის შესახებ მან Twitter-ის ოფიციალურ გვერდზე დაწერა.
„გულწრფელად ვულოცავ ანტონიო გუტიერეშს გაეროს გენერალურ მდივნად ხელახლა არჩევას. ახლა ისე როგორც არასროს მსოფლიოს მულტილატერალიზმი ესაჭიროება. საქართველო მადლიერია თქვენ მიერ წლების განმავლობაში გაწეული სამსახურისათვის და ველი ჩვენი ღრმა თანამშრომლობის გაგრძელებას”, - წერს პრეზიდენტი.
გუტერეში გაეროს გენერალურ მდივნად მეორე ვადით 18 ივნისს გაეროს გენერალურ ასამბლეაზე აირჩიეს. ის ამ თანამდებობაზე 2022 წლის 1 იანვრიდან 2026 წლის 31 დეკემბრის ჩათვლით იქნება.
აღსანიშნავია, რომ გუტერეში ერთადერთი კანდიდატი იყო გენერალური მდივნის პოსტზე. პირველად პოსტი მან 2017 წლის 1 იანვარს დაიკავა.
აღსანიშნავია, რომ გაერო გენერალურ მდივანს ხუთი წლის ვადით ირჩევს. ერთსა და იმავე ადამიანს გაეროს ხელმძღვანელობა შეუზღუდავად, რამდენიმე ვადით შეუძლია, თუმცა აქამდე არც ერთ გენერალურ მდივანს არ უსარგებლია ამ უფლებით − ათ წელზე მეტხანს არც ერთი მათგანი არ დარჩენილა თანამდებობაზე.
