თბილისი, 22 აპრილი – Sputnik. უკრაინაში საქართველოს საგანგებო და სრულუფლებიანი ელჩი თეიმურაზ შარაშენიძე კიევში დაბრუნდა და მოვალეობების აღსრულებას შეუდგა, ნათქვამია საქართველოს საგარეო საქმეთა სამინისტროს განცხადებაში.
საქართველომ უკრაინიდან ელჩი 2020 წლის მაისში გამოიწვია, მას შემდეგ, რაც საქართველოს ექს-პრეზიდენტი მიხეილ სააკაშვილი, რომელზეც საქართველოში რამდენიმე სისხლის სამართლის საქმეზე ძებნაა გამოცხადებული, უკრაინის რეფორმების ეროვნული საბჭოს აღმასრულებელი კომიტეტის ხელმძღვანელად დაინიშნა. უკრაინის პრეზიდენტმა ვლადიმირ ზელენსკიმ სააკაშვილი აღნიშნულ თანამდებობაზე საქართველოს პირველი პირების განცხადებების მიუხედავად დანიშნა.
„დიდხნიანი პაუზის შემდეგ უკრაინაში საქართველოს ელჩი თეიმურაზ შარაშენიძე კიევში დაბრუნდა. ეს არის 2021 წლის 15 აპრილს საქართველოს პრეზიდენტ სალომე ზურაბიშვილსა და უკრაინის პრეზიდენტ ვლადიმირ ზელენსკის შორის სატელეფონო საუბრისას მიღწეული შეთანხმების შედეგი“, – ნათქვამია საგარეო უწყების განცხადებაში.
უწყების ინფორმაციით, ელჩმა უკვე გამართა შეხვედრა უკრაინის საგარეო საქმეთა მინისტრის მოადგილესთან ვასილ ბოდნართან. მხარეებმა გამოთქვეს მზადყოფნა, აქტიურად ითანამშრომლონ საქართველოსა და უკრაინის სტრატეგიული პარტნიორობის შემდგომი გაღრმავების მიმართულებით.
