თბილისი, 18 ივლისი — Sputnik. მამუკა ბახტაძე საქართველოს პრემიერ-მინისტრის რანგში პირველი ვიზიტით ბრიუსელს ეწვევა, ნათქვამია საქართველოს მთავრობის ადმინისტრაციის მიერ გამოქვეყნებულ განცხადებაში.
მამუკა ბახტაძე ქვეყნის პრემიერ-მინისტრი 20 ივნისს გახდა, გიორგი კვირიკაშვილის თანამდებობიდან გადადგომის შემდეგ.
უწყების ცნობით, საქართველოს მთავრობის მეთაური ბელგიის სამეფოში სამუშაო ვიზიტით 18-20 ივლისს გაატარებს.
სამუშაო ვიზიტი ბელგიის სამეფოში დღეს ნატოს გენერალურ მდივანთან იენს სტოლტენბერგთან შეხვედრით დაიწყება, რის შემდეგაც საინფორმაციო საშუალებებისთვის განცხადებები გაკეთდება.
ბელგიამ საქართველო უსაფრთხო ქვეყნების რიცხვში შეიტანა>>>
ხვალ საქართველოს პრემიერ-მინისტრს ევროპული საბჭოს პრეზიდენტი დონალდ ტუსკი უმასპინძლებს. საქართველოს მთავრობის მეთაური ასევე შეხვედრებს გამართავს ბელგიის სამეფოს ვიცე-პრემიერთან, ევროკომისართან ევროპის სამეზობლო პოლიტიკისა და გაფართოების საკითხებში იოჰანეს ჰანთან, ევროკომისართან ვაჭრობის საკითხებში სესილია მალმსტრომთან და ევროკომისიის ვიცე-პრეზიდენტთან ვალდის დომბროვსკისთან.
საქართველოს დელეგაციაში, რომელსაც პრემიერ-მინისტრი ხელმძღვანელობს, საგარეო საქმეთა მინისტრი დავით ზალკალიანი და თავდაცვის მინისტრი ლევან იზორია არიან.
