კანონი ამოქმედდა - საქართველოს უკვე ნაკლები მინისტრი ჰყავს

© photo: Sputnikსაქართველოს მთავრობა
საქართველოს მთავრობა - Sputnik საქართველო
გამოწერა
საქართველოში სამინისტროების რაოდენობა შემცირდა, მაგრამ რეორგანიზაცია იმ სამინისტროებში, რომელთა უფლებამოსილება გაიზარდა, კიდევ რამდენიმე თვე გაგრძელდება

თბილისი, 12 ივლისი — Sputnik. შესწორებები კანონში „საქართველოს მთავრობის სტრუქტურის, უფლებამოსილებისა და საქმიანობის წესის შესახებ", რომელიც მინისტრთა კაბინეტის წევრების შემცირებას გულისხმობს, ამოქმედდა — დოკუმენტი გამოქვეყნებულია „საქართველოს საკანონმდებლო მაცნეს" ვებ-გვერდზე.

ამიერიდან საქართველოს 13-ის ნაცვლად ათი მინისტრი და ერთი სახელმწიფო მინისტრი ჰყავს. თუმცა, რეორგანიზაციის პროცესი იმ უწყებებში რომლებსაც ახალი ფუნქციები დაემატა, სამი თვე გაგრძელდება.

საქართველოს პრემიერ-მინისტრი მამუკა ბახტაძე - Sputnik საქართველო
პრემიერმა მთავრობის განახლებული შემადგენლობა დაასახელა

შესწორებების თანახმად, შეიქმნა ახალი სამინისტრო — განათლების, კულტურისა და სპორტის, რომელიც შეითავსებს ამჟამად არსებული ორი უწყების — განათლებისა და მეცნიერებისა და კულტურისა და სპორტის სამინისტროების ფუნქციებს.

ამას გარდა, იქნება ოკუპირებული ტერიტორიებიდან იძულებით გადაადგილებულ პირთა, ჯანმრთელობისა და სოციალური დაცვის სამინისტრო, რომელიც შეითავსებს ჯანმრთელობისა და სოციალური დაცვისა და ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს ფუნქციების ნაწილს. ფუნქციების ნაწილის შესრულება კი რეგიონული განვითარებისა და ინფრასტრუქტურის სამინისტროს დაეკისრება.

ფუნქციები, რომლებიც ეხება მიგრაციისა და საერთაშორისო დაცვის საკითხებს, გადაეცა შინაგან საქმეთა სამინისტროს, ხოლო რეპატრიაციის საკითხებს შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატი ითავსებს.

კანონის თანახმად, იუსტიციის სამინისტროს შეუერთდა სასჯელაღსრულებისა და პრობაციის სამინისტრო. იუსტიციის სამინისტროში შეიქმნება სპეციალური პენიტენციური სამსახური, რომელიც ამ სამინისტროს ფუნქციებს შეასრულებს.

გმირთა მოედანი - Sputnik საქართველო
ჩინოვნიკები ფეხით ივლიან – მთავრობა სამთავრობო ავტოპარკიდან ათას მანქანას ყიდის

რეფორმა ეხება ეკონომიკისა და მდგრადი განვითარების სამინისტროსაც. სივრცობრივი განვითარების საკითხები რეგიონული განვითარებისა და ინფრასტრუქტურის სამინისტროს მოვალეობაში გადადის.

სამინისტროები, რომლებსაც რეორგანიზაცია შეეხო, საბოლოო სახეს, სავარაუდოდ, ოქტომბერში, 2019 წლის სახელმწიფო ბიუჯეტის ჩამოყალიბების პროცესში მიიღებენ.

ამასთან, იმ სამინისტროებისთვის განკუთვნილ დაფინანსებას, რომელთა გაუქმებაც არის დაგეგმილი, 2018 წლის ბოლომდე მიიღებენ ის სამინისტროები, რომლებიც მათ ფუნქციებს შეითავსებენ.

საქართველოს პრემიერ-მინისტრმა მამუკა ბახტაძემ საზოგადოებას უკვე წარუდგინა მინისტრობის ახალი კანდიდატები.

მინისტრთა კაბინეტში მინისტრის პორტფელს ახალი სახეები ჩაიბარებენ:

  1. საქართველოს განათლების, კულტურისა და სპორტის მინისტრი – მიხეილ ბატიაშვილი
  2. საქართველოს ფინანსთა მინისტრი – ივანე მაჭავარიანი
  3. საქართველოს ეკონომიკისა და მდგრადი განვითარების მინისტრი – გიორგი ქობულია
  4. საქართველოს საგარეო საქმეთა მინისტრი – დავით ზალკალიანი

დანარჩენი მინისტრები რჩებიან იმ პოსტებზე, რომელსაც აქამდე იკავებდნენ.

მთავრობის განახლებულ შემადგენლობას ნდობა პარლამენტმა უნდა გამოუცხადოს.

მინისტრების რაოდენობის შემცირება გათვალისწინებული იყო „მცირე მთავრობის" კონცეფციით.

ყველა ახალი ამბავი
0