ცნობილი გახდა, როდის ეყოლება საქართველოს ახალი მთავრობა

© FB / Mamuka Bakhtadze მამუკა ბახტაძე
მამუკა ბახტაძე - Sputnik საქართველო
გამოწერა
საქართველოს პარლამენტის დეპუტატები შემდეგ კვირაში მინისტრობის კანდიდატებს მოუსმენენ და შემდეგ გადაწყვეტენ, გამოუცხადონ თუ არა მათ ნდობა.

თბილისი, 6 ივლისი — Sputnik. საქართველოს პარლამენტმა დაამტკიცა ინიციატივა სამინისტროების რაოდენობის შემცირების შესახებ, ახლა ქვეყნის პრემიერ-მინისტრმა მამუკა ბახტაძემ მინისტრობის კანდიდატები უნდა წარადგინოს.

„ახალ კაბინეტში ახალი სახეები იქნებიან", — განუცხადა მმართველი პარტიის „ქართული ოცნება — დემოკრატიული საქართველოს" გენერალურმა მდივანმა, თბილისის მერმა კახა კალაძემ საზოგადოებრივი მაუწყებლის პირველ არხს.

გავრცელებული ინფორმაციით, მინისტრთა ახალი კაბინეტის შემადგენლობას საზოგადოება ორშაბათს, 9 ივლისს გაიგებს.

ტრიბუნა გამოსვლებისთვის - Sputnik საქართველო
სამინისტროების შემცირება საქართველოში მეოთხედ მილიარდ ლარს მოიტანს

საქართველოში მალე 13-ის ნაცვლად 10 მინისტრი და ერთი სახელმწიფო მინისტრი იქნება. „მცირე მთავრობის" კონცეფცია აღმასრულებელი ხელისუფლების მუშაობის ოპტიმიზაციასა და ხარჯების დაზოგვისკენ არის მიმართული.

კალაძის განცხადებით, პრემიერმა მმართველი პარტიის დეპუტატებთან კონკრეტულ კანდიდატებთან დაკავშირებით კონსულტაციები გამართა.

„პრემიერს ჰქონდა რამდენიმე შეხვედრა, სადაც იყო მსჯელობა სამინისტროების გაერთიანებაზე, მინისტრობის კანდიდატებზე. კანდიდატები უახლოეს დღეებში იქნებიან წარმოდგენილი. კონკრეტიკაზე თავს შევიკავებ, უხერხული იქნება ჩემი მხრიდან ამის გაჟღერება. თავად პრემიერი ისაუბრებს ამაზე", — განაცხადა კალაძემ.

კენჭისყრა მთავრობისთვის ნდობის გამოცხადებაზე 15 ივლისს გაიმართება, განაცხადა, თავის მხრივ, პარლამენტის თავმჯდომარის პირველმა მოადგილემ თამარ ჩუგოშვილმა. 13-14 ივლისს პარლამენტის კომიტეტებში მოუსმენენ მინისტრობის კანდიდატებსა და პრემიერ მამუკა ბახტაძეს თავისის სამთავრობო პროგრამით.

თუ „ქართულ ოცნებაში" უთანხმოება არ იქნება, მთავრობა პარლამენტის ნდობას ადვილად მოიპოვებს, რადგან მმართველ პარტიას საკანონმდებლო ორგანოში უმრავლესობა ჰყავს.

ამგვარად, ერთ თვეზე ნაკლებ დროში პარლამენტს საქართველოს უკვე მეორე მთავრობისთვის მოუწევს ნდობის გამოცხადება. ბახტაძე ქვეყნის პრემიერ-მინისტრი 20 ივნისს, გიორგი კვირიკაშვილის გადადგომის შემდეგ გახდა.

ყველა ახალი ამბავი
0