თბილისი, 2 მარტი — Sputnik. საქართველოს დელეგაცია პრემიერ-მინისტრ გიორგი კვირიკაშვილის ხელმძღვანელობით ერთდღიანი ოფიციალური ვიზიტით სომხეთს ეწვია, სადაც გაიმართება შეხვედრები ქვეყნის პირველ პირებთან, აღნიშნულია პრემიერის Facebook-გვერდზე განთავსებულ განცხადებაში.
ქართული დელეგაციის დახვედრის ოფიციალური ცერემონია ერევნის საერთაშორისო აეროპორტში გაიმართა. დელეგაციას საპატიო ყარაული შეეგება, შესრულდა ორი ქვეყნის სახელმწიფო ჰიმნები.
აეროპორტში გიორგი კვირიკაშვილს მისი კოლეგა — სომხეთის პრემიერ-მინისტრი კარენ კარაპეტიანი დახვდა.
ოფიციალური ვიზიტის ფარგლებში საქართველოს პრემიერ-მინისტრი პირისპირ შეხვედრას გამართავს კარაპეტიანთან, შემდეგ მოლაპარაკებები ორი ქვეყნის მთავრობების წევრთა მონაწილეობით, გაფართოებულ ფორმატში გაგრძელდება.
ამას გარდა, კვირიკაშვილი სომხეთის პრეზიდენტ სერჟ სარგსიანს შეხვდება.
ქართული დელეგაციის შემადგენლობაში არიან: პირველი ვიცე-პრემიერი, ეკონომიკისა და მდგრადი განვითარების მინისტრი დიმიტრი ქუმსიშვილი, ვიცე-პრემიერი, საგარეო საქმეთა მინისტრი მიხეილ ჯანელიძე, თავდაცვის მინისტრი ლევან იზორია, ფინანსთა მინისტრი მამუკა ბახტაძე, პრემიერ-მინისტრის მრჩეველი საგარეო ურთიერთობათა საკითხებში თედო ჯაფარიძე, ტურიზმის ეროვნული ადმინისტრაციის ხელმძღვანელი გიორგი ჩოგოვაძე და პარლამენტის თავმჯდომარის მოადგილე, სომხეთის რესპუბლიკის პარლამენტთან მეგობრობის ჯგუფის ხელმძღვანელი გიორგი ვოლსკი.
საქართველოს პრემიერი სომხეთში გასული წლის 1 დეკემბერს უნდა ჩასულიყო, მაგრამ მაშინ მინისტრთა კაბინეტში ცვლილებების გამო ვიზიტი გადაიდო.