თბილისი, 21 დეკემბერი — Sputnik. პატიმრებს, რომელთაც გათავისუფლებამდე ერთი წელი დარჩათ, 2018 წლის 1 იანვრიდან ახალ დაწესებულებაში მოათავსებენ, სადაც მათ შესაძლებლობა ექნებათ, აითვისონ რაიმე პროფესია და თავისუფალი ცხოვრებისადმი ადაპტაცია შეძლონ, განაცხადა სასჯელაღსრულებისა და პრობაციის მინისტრმა კახა კახიშვილმა.
„1 იანვრიდან გაიხსნება გათავისუფლებისთვის მომზადების თავისუფლების აღკვეთის დაწესებულება. გათავისუფლებისთვის მომზადების დაწესებულებაში განთავსდებიან პირები, რომლებსაც კალენდარულად გათავისუფლებამდე დარჩათ ერთი წელი. მათ ექნებათ შესაძლებლობა დაეუფლონ პროფესიებს. გარდა ამისა, დროებით დატოვონ დაწესებულება იმ შემთხვევაში, თუ იშოვიან სამუშაოს, ან სასწავლებელში ივლიან", — განაცხადა კახიშვილმა.
გარდა მუშაობისა და სწავლისა, პატიმრებს შესაძლებლობა ექნებათ, დატოვონ დაწესებულება უქმეებსა და სადღესასწაულო დღეებში.
2017 წლის ოქტომბრის მონაცემებით, სასჯელაღსრულების დაწესებულებებში 9,4 ათასამდე პატიმარი იმყოფება.
ამჟამად საქართველოში საპატიმროები პატიმრების რისკის ხარისხისა და დაპატიმრების სახის მიხედვით სამ ტიპად იყოფა — ღია, ნახევრად ღია და დახურული. ამ ბოლო ტიპის დაწესებულებებში მძიმე დანაშაულისა და ციხის შიდა განაწესის დაუმორჩილებლობისთვის იხდიან სასჯელს.
