04:08 23 ნოემბერი 2017
პირდაპირი ეთერი
ირაკლი კობახიძე რუმინეთში

საქართველომ და რუმინეთმა საზღვაო და საჰაერო ხიდების გადება გადაწყვიტეს

© FB / Parliament of Georgia
პოლიტიკა
მოკლე ბმულის მიღება
საქართველოს საგარეო პოლიტიკა (84)
10 0 0

საქართველოს პარლამენტის თავმჯდომარემ შეხვედრები გამართა რუმინეთის პარლამენტსა და მთავრობაში და ქვეყნებს შორის ურთიერთობების გაღრმავების საკითხები განიხილა

თბილისი, 15 ნოემბერი — Sputnik. საქართველოს პარლამენტის თავმჯდომარე ირაკლი კობახიძემ და რუმინეთის ვიცე-პრემიერმა იონ-მარკელ სიოლაკუმ საქართველოსა და რუმინეთს შორის საზღვაო სატრანსპორტო დერეფნისა და პირდაპირი ავიამიმოსვლის შექმნის მნიშვნელობაზე იმსჯელეს.

შეხვედრა პარლამენტის თავმჯდომარის რუმინეთში ოფიციალური ვიზიტის ფარგლებში გაიმართა. ვიზიტი 13 ნოემბერს დაიწყო, აღნიშნულია საქართველოს საკანონმდებლო ორგანოს ვებ-გვერდზე განთავსებულ განცხადებაში.

"როგორც მოგეხსენებათ, რუმინეთი საქართველოს ერთ-ერთი ყველაზე მნიშვნელოვანი მხარდამჭერია. რაც შეეხება ეკონომიკური კუთხით თანამშრომლობას, ვისაუბრეთ საზღვაო გზის მნიშვნელობაზე — რომ გაიჭრას დერეფანი პორტებს შორის და ასევე, პირდაპირი ავიარეისის დანიშვნაზე საქართველოსა და რუმინეთს შორის, რაც არა მხოლოდ ტურისტული კუთხით გააძლიერებს ქვეყნებს შორის თანამშრომლობას, არამედ ეკონომიკური კუთხითაც", — განუცხადა ჟურნალისტებს სიოლაკუმ შეხვედრის დასრულების შემდეგ.

მხარეებმა განიხილეს ორმხრივი ურთიერთობების და აღნიშნეს, რომ უნდა გამოიძებნოს თანამშრომლობის გაღრმავების ახალი გზები. საუბარი იყო თანამშრომლობის გააქტიურებაზე ეკონომიკის, უსაფრთხოების, ტურიზმის, საზღვაო ვაჭრობის, სოფლის მეურნეობის და კულტურის სფეროებში.

მათ ასევე იმსჯელეს საქართველოს ინტეგრაციის პროცესზე ნატოსა და ევროკავშირთან.

"რა თქმა უნდა, საქართველოს აქვს საშუალება, რომ რუმინეთის გამოცდილება გაიზიაროს ევროკავშირში და ნატოში გაწევრიანების კუთხით, რადგან ეს გზა ცოტა ხნის წინ გაიარა რუმინეთმა", — აღნიშნა სიოლაკუმ.

რუმინეთის აღმასრულებელი ხელისუფლების წარმომადგენლებთან მოლაპარაკებების შედეგები კობახიძემ ჟურნალისტებთან შეაჯამა.

"საუბარი გვქონდა კონკრეტულ საკითხებზე, კონკრეტულ პროექტებზე, რომლებიც შეიძლება განხორციელდეს. ძალიან მნიშვნელოვანია, რომ აღმასრულებელ ხელისუფლებებს შორის დამყარებულია მჭიდრო კავშირი… ძალიან აქტიურად უნდა ამუშავდეს ეკონომიკური კომისია ორ ქვეყანას შორის და ეს ყველაფერი ხელს შეუწყობს ქვეყნებს შორის კიდევ უფრო მჭიდრო პოლიტიკური და ეკონომიკური ურთიერთობების ჩამოყალიბებას", — განაცხადა კობახიძემ.

რუმინეთში ოფიციალური ვიზიტის მსვლელობისას ირაკლი კობახიძე შეხვდა რუმინეთის საგარეო საქმეთა მინისტრ ტეოდორ მელესკანუს, პარლამენტის დეპუტატთა პალატის პრეზიდენტ ლივიუ დრაგნეასა და ქვეყნის პარლამენტის სენატის პრეზიდენტ კალინ პოპესკუ ტარიჩეანუს.

გარდა ამისა, ის მონაწილეობდა მრგვალ მაგიდაში, სადაც განიხილეს შავი ზღვის ქვეყნების თანამშრომლობისა და უსაფრთხოების საკითხები.

კობახიძის ვიზიტი რუმინეთში 15 ნოემბერს დასრულდება.

ამა წლის აპრილში რუმინეთს საქართველოს პრემიერ-მინისტრი გიორგი კვირიკაშვილი ეწვია. მისი რუმინელ კოლეგასთან, სორინ გრინდიანუსთან შეხვედრის მთავარი თემა იყო ბიზნესმენებს შორის ეკონომიკური თანამშრომლობის გაფართოება და კავშირების გაღრმავება.

ოქტომბრის ბოლოს ცნობილი გახდა, რომ რუმინული საბიუჯეტო ავიაკომპანია Blue Air Airline საქართველოში პირველ ჩარტერულ რეისებს 2018 წლის 3 და 10 თებერვალს განახორციელებს.

საქართველომ და რუმინეთმა დიპლომატიური ურთიერთობები 1992 წლის 25 ივნისს დაამყარეს.

საქართველო და რუმინეთი თანამშრომლობენ ეკონომიკის, ტურიზმის, სოფლის მეურნეობის, საზღვაო ვაჭრობის, კულტურის, მეცნიერებისა და სპორტის სფეროებში. თანამშრომლობის განსაკუთრებით პრიორიტეტული მიმართულებებია ვაჭრობა, ეკონომიკა, ენერგეტიკა და ტრანსპორტი.

 

თემები:
საქართველოს საგარეო პოლიტიკა (84)

მთავარი თემები