თბილისი, 8 ნოემბერი — Sputnik. ადგილობრივი თვითმმართველი ორგანოების არჩევნების შედეგად საქართველოს ოთხი ქალაქისა და 54 რაიონის მერები უფლებამოსილების აღსრულებას 12 ნოემბრიდან შეუდგებიან, ნათქვამია საქართველოს ცენტრალური საარჩევნო კომისიის ვებ-გვერდზე.
საქართველოს მოქალაქეებმა 21 ოქტომბერს აირჩიეს 64 ქალაქისა და რაიონის მერები და საკრებულოს დეპუტატები. თუმცა ამ ეტაპისთვის უფლებამოსილების აღსრულებას მხოლოდ 58 მერი დაიწყებს.
საქმე ისაა, რომ ქალაქ ქუთაისში, ასევე მარტვილის, ბორჯომის, ოზურგეთის, ხაშურისა და ყაზბეგის რაიონებში მერების არჩევნების მეორე ტურია დანიშნული, რადგან პირველ ტურში ვერც ერთმა კანდიდატმა ვერ შეძლო 50%-ზე მეტი ხმის მიღება.
მეორე ტური 12 ნოემბერს გაიმართება.
რაც შეეხება არჩეულ მერებს, ერთადერთი რაიონი, სადაც პირველივე ტურში ოპოზიციის კანდიდატმა გაიმარჯვა, თიანეთია. რაიონის მთავრობას ერთ დროს მმართველი პარტიის წევრი, ამ ეტაპზე კი ოპოზიციური პარტიის "ერთიანი საქართველოსთვის" ლიდერი თამაზ მეჭიაური უხელმძღვანელებს.
