თბილისი, 6 სექტემბერი — Sputnik. „საქართველოს რესპუბლიკურმა პარტიამ" ადგილობრივი თვითმმართველობის არჩევნებში თბილისის საკრებულოს სიის პირველი ხუთეული წარადგინა, ნათქვამია რესპუბლიკური პარტიის ვებ-გვერდზე გავრცელებულ განცხადებაში.
პარტიის პირველი ნომერი ხათუნა სამნიძე იქნება. შემდეგ მოდიან მიხეილ ჩემია, დავით ზურაბიშვლი, თამარ კორძაია და ლაშა ომარაშვილი.
როგორც პარტიის ერთ-ერთმა ლიდერმა, ლევან ბერძენიშვილმა განაცხადა, „განახლებული შემადგენლობა „რესპუბლიკურ პარტიას" სათანადოდ წარმოაჩენს საზოგადოების წინაშე".
ბერძენიშვილის განცხადებით, შემდეგი ხუთეული ამომრჩევლების წინაშე უახლოეს მომავალში იქნება წარმოდგენილი.
საქართველოს მოსახლეობა 21 ოქტომბერს საკრებულოს დეპუტატებს, ქალაქებისა და რაიონების მერებს აირჩევს. თბილისის საკრებულოში 50 სადეპუტატო მანდატია, რომლებიც არჩევნების შედეგების მიხედვით გამარჯვებულებს შორის პროპორციული და მაჟორიტარული სიტემით განაწილდება.
