თბილისი, 18 აგვისტო — Sputnik. საქართველოს მთავარი პროკურორი ირაკლი შოთაძე და ბელარუსის გენერალური პროკურორი ალექსანდრ კონიუკი მინსკში ორმხრივი მოლაპარაკებების დროს უწყებებს შორის შემდგომი თანამშრომლობის გაღრმავების შესახებ შეთანხმდნენ, აღნიშნულია საქართველოს პროკურატურის ვებ-გვერდზე განთავსებულ განცხადებაში.
შეხვედრა საქართველოსა და ბელარუსის მთავარ პროკურორებს შორის რამდენიმე დღის წინ შედგა, მაგრამ ინფორმაცია მხოლოდ ახლა გავრცელდა. სამუშაო ვიზიტის დროს შოთაძეს ახლდა მთავარი პროკურორის მოადგილე მამუკა ვასაძე, კახეთის რეგიონის საოლქო პროკურორი ვაჟა ფანოზაშვილი და მთავარი პროკურატურის ეკონომიკური დეპარტამენტის უფროსი მერაბ მურღულია.
"შემდგარი შეხვედრა ბელარუსის რესპუბლიკის გენერალური პროკურატურის ხელმძღვანელობასა და საქართველოს მთავარი პროკურატურის დელეგაციას შორის ხელს შეუწყობს ორივე ქვეყნის სამეთვალყურეო უწყებებს შორის ურთიერთთანამშრომლობის განვითარებას", — აღნიშნულია ბელარუსის გენერალური პროკურატურის განცხადებში.
მხარეებმა განიხილეს საქართველოს მთავარ პროკურატურასა და ბელარუსის გენერალურ პროკურატურას შორის 2015 წლის 22 ივლისს გაფორმებული მემორანდუმით გათვლისწინებული საკითხები. მხარეებმა განიხილეს ასევე დანაშაულთან და კორუფციასთან ბრძოლისა და ეკონომიკური დანაშაულის წინააღმდეგ მიმართული ღონისძიებების და გამოცდილების ურთიერთგაზიარების თემები.
