თბილისი, 21 ივნისი — Sputnik. საქართველოს პარლამენტის თავმჯდომარემ ირაკლი კობახიძემ განაცხადა, რომ საქართველოს ყოფილი პრემიერ-მინისტრის, მილიარდერ ბიძინა ივანიშვილის ჯანმრთელობის გაუარესების შესახებ ჭორებს მმართველი პარტიის ოპონენტები ავრცელებენ.
გასულ უქმეებზე ქართულ საინფორმაციო საშუალებებში გავრცელდა ცნობა, რომ ექს-პრემიერს გულთან დაკავშირებული სერიოზული პრობლემები აღენიშნება. ტელეკომპანია Rustavi2-ის გენერალურმა დირექტორმა საკუთარ წყაროებზე დაყრდნობით განაცხადა, რომ ივანიშვილმა ინსულტი გადაიტანა და ამჟამად გერმანიაში მკურნალობს. სამშაბათს გაზეთ "ქრონიკა+“-ის რედაქტორმა ელისო კილაძემ განაცხადა, რომ ივანიშვილის შემთხვევაში ნებისმიერმა ემოციამ შეიძლება მიოკარდიუმის ინფარქტი გამოიწვიოს.
„მინდა ყველა დავარწმუნო, რომ ეს სიცრუეა… ეს უმარტივესი, ბინძური კამპანიაა", — განაცხადა კობახიძემ ტელეარხ Rustavi2-ზე გადაცემა „არჩევანში".
პარლამენტის თავმჯდომარე დარწმუნებულია, რომ აღნიშნულ დეზინფორმაციას პოლიტიკური ოპონენტები ავრცელებენ.
„არა მგონია, რომ გავრცელებული ინფორმაცია იმსახურებდეს რაიმე ტიპის სერიოზულ ყურადღებას. სამწუხაროდ, ეს აჩვენებს ძალიან მძიმე სახეს ჩვენი ოპონენტების ერთი ნაწილის. ეს არის ძალიან სამწუხარო. ჩვენ გაქვს ინფორმაცია ბატონი ბიძინა ივანიშვილის ჯანმრთელობის მდგომარეობასთან დაკავშირებით და აბსოლუტურად არასერიოზულია რაიმე მსჯელობა იმასთან დაკავშირებით, რაც გაავრცელეს ჩვენმა კონკრეტულმა პოლიტიკურმა ოპონენტებმა", — განაცხადა ირაკლი კობახიძემ.
მანამდე ივანიშვილის ჯანმრთელობის მდგომარეობის გაუარესების შესახებ ინფორმაცია მისმა შვილმა, რეპერმა ბერამ უარყო.
