თბილისი, 7 ივნისი — Sputnik. სავალდებულო სამხედრო სამსახურის საკითხის დარეგულირება ორგანული კანონითაც შეიძლება, მიაჩნია სამხედრო ექსპერტ ვახტანგ მაისაიას.
„საქართველოს შეიარაღებული ძალები თითქმის მთლიანად საკონტრაქტო სამსახურზე გადავიდა. აქ სამხედროების 80% კონტრაქტით მსახურობს და მხოლოდ 20%-ია წვევამდელი. აქედან გამომდინარე სავალდებულო სამხედრო სამსახურის საკითხის კონსტიტუციაში ჩაწერა აუცილებლად სულაც არ მიმაჩნია", — განუცხადა ვახტანგ მაისაიამ „Sputnik საქართველოს".
ექსპერტის თქმით, საკონტრაქტო სამსახურს ბევრი დადებითი მხარე აქვს.
„ეს არის პროფესიონალური არმია, სადაც ჩვენი მოქალაქეები ნებაყოფლობით მსახურობენ", – აღნიშნა ვახტანგ მაისაიამ.
მოქმედ კონსტიტუციაში ჩაწერილია, რომ საქართველოს დაცვა და სამხედრო ვალდებულების მოხდა საამისო უნარის მქონე ყველა მოქალაქის მოვალეობაა.
პარლამენტის თავმჯდომარის ირაკლი კობახიძის განცხადებით, სავალდებულო სამხედრო სამსახური საქართველოს კონსტიტუციაში აღარ ჩაიწერება.
„ეს კონსტიტუციის დონეზე აღარ იქნება მოწესრიგებული. შესაბამისად, მთავრობის და პარლამენტის გადასაწყვეტია, თუ როგორ ჩამოყალიბდება სამხედრო გაწვევის სისტემა", — განაცხადა კობახიძემ ტელეკომპანია „იმედის" ეთერში.
სამხედრო სამსახური საქართველოში ოთხ კატეგორიად იყოფა: სავალდებულო, საკონტრაქტო, საკადრო და სარეზერვო.
საკონტრაქტო სამხედრო სამსახურში მიიღებიან 18-დან 35-წლამდე წვევამდელები და ის ახალგაზრდები, რომლებსაც გავლილი აქვთ სამხედრო სავალდებულო ან სამხედრო საკონტრაქტო სამსახური. სავალდებულო სამხედრო სამსახურში კი იწვევენ 18-დან 27 წლის ასაკის მამაკაცებს. ახალწვეულები გადიან სამსახურს შეიარაღებულ ძალებში, შსს-ში, სახელმწიფო უსაფრთხოების სამსახურში, სასჯელაღსრულებისა და პრობაციის სამინისტროში და სახელმწიფო დაცვის სპეციალურ სამსახურში.
ჯარის გარდა, ახალწვეულები ძირითადად მნიშვნელოვანი სახელმწიფო ობიექტების დაცვას ახორციელებენ. ახალწვეულები სამი თვის განმავლობაში საწყისი საბრძოლო მომზადების კურსს გადიან. სამთვიანი კურსის გავლის შემდეგ, განწესის გარდა, ყოველდღე საბრძოლო მომზადების საათები ტარდება, რომელსაც საკონტრაქტო სამსახურში გადიან.
