თბილისი, 16 მაისი — Sputnik. რუსეთთან ურთიერთობების საკითხებში საქართველოს პრემიერ-მინისტრის სპეციალური წარმომადგენლის ზურაბ აბაშიძისა და რუსეთის საგარეო საქმეთა მინისტრის მოადგილის გრიგორი კარასინის მორიგი შეხვედრა პრაღაში ივნისის მეორე ნახევარში იგეგმება.
აბაშიძე-კარასინის შეხვედრები — საქართველოსა და რუსეთს შორის არაფორმალური დიალოგის ფორმატია, რომელიც 2008 წელს დიპლომატიური ურთიერთობების გაწყვეტის შემდეგ იმართება. ფორმატი პოლიტიკური საკითხების განხილვას არ ითვალისწინებს.
„შეხვედრა ივნისში ჩატარდება, მაგრამ ზუსტი თარიღი ჯერჯერობით დადგენილი არ გვაქვს, სავარაუდოდ, ივნისის მეორე ნახევარში", — განუცხადა „Sputnik-საქართველოს" ზურაბ აბაშიძემ.
საქართველოსა და რუსეთს შორის დიპლომატიური ურთიერთობები თბილისმა 2008 წელს მოსკოვის მიერ აფხაზეთისა და ცხინვალის რეგიონის დამოუკიდებლობის აღიარების საპასუხოდ გაწყვიტა.
ამჟამად ქვეყნებს შორის დიალოგი მხოლოდ ჟენევის დისკუსიებისა და აბაშიძე-კარასინის რეგულარული შეხვედრების ფორმატში მიმდინარეობს.
აბაშიძე-კარასინის მოლაპარაკებები ტრადიციულად პრაღაში იმართება და ითვალისწინებს დისკუსიას მხოლოდ ჰუმანიტარულ და ეკონომიკურ საკითხებზე.
ჟენევის დისკუსიები 2008 წლის ოქტომბრიდან იმართება. დღევანდელ დღეს ეს საქართველოს წარმომადგენლებსა და აფხაზეთისა და ცხინვალის რეგიონის დე-ფაქტო ხელისუფლებებს შორის დიალოგის ერთადერთი ფორმატია. მოლაპარაკებებში ასევე მონაწილეობენ რუსეთის, აშშ-ის, გაეროს, ეუთოსა და ევროკავშირის წარმომადგენლები.
გიორგი კვირიკაშვილის ხელმძღვანელობით საქართველოს მთავრობის მოღვაწეობის ერთ-ერთ პრიორიტეტს რუსეთთან ურთიერთობების მოგვარება წარმოადგენს. ამავე დროს საქართველოს ხელისუფლება პროდასავლური პოლიტიკის გატარებას აგრძელებს.
