ღარიბაშვილი: ევროკომისიის გადაწყვეტილება საქართველოს მომავალს განსაზღვრავს

თბილისი, 18 დეკემბერი — Sputnik. საქართველომ კარგი შედეგი მიიღო ევროკავშირთან სავიზო რეჟიმის ლიბერალიზაციის პროცესში, — განაცხადა საქართველოს პრემიერ–მინისტრმა ირაკლი ღარიბაშვილმა დღეს18 დეკემბერს გამართულ სპეციალურ ბრიფინგზე. 

ევროკომისიამ სწორედ დღეს გამოაქვეყნა საქართველოს მიერ ვიზალიბერალიზაციის სამოქმედო გეგმის შესრულების შესახებ საბოლოო და დადებითი დასკვნა. 

„დღეს ჩვენი ქვეყნისთვის, მისი თითოეული მოქალაქისთვის ისტორიული დღეა. ევროინტეგრაციის გზაზე საქართველომ გადადგა ნაბიჯი, რომელიც დიდწილად განსაზღვრავს ჩვენს მომავალს ევროპულ სახელმწიფოთა ერთიან ოჯახში. სულ ცოტა ხნის წინ ევროკომისიამ გამოაქვეყნა ანგარიში საქართველოს მიერ სავიზო რეჟიმის ლიბერალიზაციის სამოქმედო გეგმის შესრულებასთან დაკავშირებით, რომელსაც ყველა ასე მოუთმენლად ველოდით. კომისიამ ცალსახად განაცხადა, რომ საქართველოს ხელისუფლებამ წარმატებით შეასრულა ევროკავშირის წინაშე აღებული ვალდებულებები და სავიზო რეჟიმის ლიბერალიზაციისთვის საჭირო ყველა რეფორმა სრულყოფილად განხორციელდა“, — განაცხადა პრემიერ–მინისტრმა. 

ევროკომისია საკანონმდებლო წინადადების წარდგენას სავიზო რეგულაციების შეცვლის შესახებ, 2016 წლის დასაწყისში აპირებს.