თბილისი, 13 ოქტომბერი — Sputnik. „ნაციონალურმა მოძრაობამ“ ქვეყნის ხელიუფლებას მოუწოდა, უარი თქვას საფინანსო ზედამხედველობის სააგენტოს ამოქმედებაზე და ამგვარად თავი აარიდოს ექს-პრემიერ ბიძინა ივანიშვილისა და პარლამენტის საფინანსო-საბიუჯეტო კომიტეტის თავმჯდომარის, თამაზ მეჭიაურის პოლიტიკურ ზეწოლას.
საქართველოს საკონსტიტუციო სასამართლომ ორშაბათს, 12 ოქტომბერს, საპარლამენტო ოპოზიციური პარტიების სარჩელის საფუძველზე, საბოლოო გადაწყვეტილების მიღებამდე შეაჩერა საკანონმდებლო ნორმები, რომელთა თანახმადაც უნდა ამუშავებულიყო საფინანსო ზედამხედველობის სამსახური.
„საკონსტიტუციო სასამართლოს წყალობით, საბანკო სისტემა არ აღმოჩნდება ივანიშვილი-მეჭიაურის პოლიტიკური ზემოქმედების ქვეშ. თუმცა, ეს დროებით. ამიტომ მოვუწოდებ ხელისუფლებას გამოიყენოს ეს პაუზა, გადახედოს ერთი კაცის კაპრიზს და მიიღოს პოლიტიკური გადაწყვეტილება, რათა სააგენტო არ ამოქმედდეს“, — განაცხადა „ნაცმოძრაობის“ დეპუტატმა პეტრე ცისკარიშვილმა.
საპარლამენტო ოპოზიციური პარტიების — „ერთიანი ნაციონალური მოძრაობისა“ და „თავისუფალი დემოკრატების“ დეპუტატებმა 22 სექტემბერს საკონსტიტუციო სასამართლოში საქართველოს პარლამენტის წინააღმდეგ ერთობლივი სარჩელი შეიტანეს. ოპოზიციონერები ირწმუნებიან, რომ საზედამხედველო სამსახურის ეროვნული ბანკის სტრუქტურიდან გამოყოფა ნაკარნახევია არა ეკონომიკური, არამედ პოლიტიკური მოტივებით.