Polycrea Handmade jewelry ნინო კიკნაძის ხელნაკეთ სამკაულს მოიცავს. ნინო პროფესიით მხატვარია. დაამთავრა სამხატვრო აკადემია. წლების განმავლობაში ამერიკაში ცხოვრობდა, სადაც პოლიმერული თიხა „აღმოაჩინა“. დღეს სწორედ ამ მასალით ქმნის ფერად და დახვეწილ სამკაულს ქალბატონებისთვის.
- ხელნაკეთი სამკაულის შექმნამ როდის გაგიტაცათ?
— ყოველთვის მიტაცებდა სამკაულის დიზაინი. ცხრა წელი ამერიკაში ვცხოვრობდი. სწორედ ამერიკაში ცხოვრების დროს აღმოვაჩინე ეს მასალა, რომელიც იქ საკმაოდ პოპულარული იყო. თავისი თვისებებიდან გამომდინარე ძალიან შემიყვარდა.
- რას ნიშნავს თქვენთვის ლამაზი სამკაული?
— როგორ გითხრათ, ყოველი ახალი სამკაულის კეთება მსიამოვნებს და მიხარია, როცა ის მოსწონთ. ლამაზი სამკაული ქალისთვის ძალიან მნიშვნელოვანი დეტალია.
- თითოეული სამკაულის და აქსესუარის დიზაინი თქვენ გეკუთვნით?
— კი, მე მეკუთვნის, ეს პროცესი ჩემთვის ძალიან საინტერესოა. ფერები თითქოს მეორდება, მაგრამ თუ დააკვირდებით დიზაინი ყოველთვის განსხვავებულია. სწორედ ამით არის გამორჩეული პოლიმერული თიხის სამკაულები. ქალბატონებს ხომ არ უყვართ, როდესაც მისნაირი აქსესუარი სხვასაც ამშვენებს.
- ამ საქმიანობაში ვინმე გეხმარებათ, თუ ყველაფერს თავად ართმევთ თავს?
— არა, ყველაფერს თავად ვართმევ თავს. დიდი წარმოება არ მაქვს. ეს ჩემი ჰობი უფროა, ვიდრე ბიზნესი.
- ვინ არის თქვენი ყველაზე დიდი კრიტიკოსი და გულშემატკივარი?
— კრიტიკოსები ნაკლებად… აი გულშემატკივრები კი ჩემი ოჯახს წევრები, მეუღლე და ჩემი და არიან. პირველად სწორედ ისინი აფასებენ ჩემს ნამუშევრებს.
- თქვენი ხელნაკეთი სამკაული საოცარი ფერებით გამოირჩევა. როგორ ქმნით ფერთა გამას? წინასწარ გეგმავთ რა ფერს რა უნდა შეუხამოთ თუ ექსპრომტად, მუშაობის დროს იქმნება ეს ფერები?
— წინასწარ დაგეგმვა არ უხდება ამ საქმეს. მუშაობის პროცესში ხდება ფერების და პრინტის შეხამება. ასე უფრო განსხვავებული და ორიგინალური გამოდის.
- სამკაულის შესაქმნელად მხოლოდ პოლიმერულ თიხას იყენებთ?
— დიახ, მხოლოდ პოლიმერულ თიხას. როდესაც დავიწყე ამ მასალაზე მუშაობა, მაშინ საქართველოში ბევრმა არ იცოდა მის შესახებ. ახლა უკვე შეიტყვეს და მუშაობენ კიდეც. მაგრამ აქ საქმე იმდენად მასალაში არ არის, რამდენადაც მუშაობის ტექნიკასა და სტილში.
- მამაკაცები თუ გიკვეთავენ საყვარელი ქალისთვის სამკაულს?
— იშვიათდ. ეს არ არის ძვირადღირებული სამკაული. ამდენად უფრო ქალბატონები ანებივრებენ საკუთარ თავს და ახლობელ ადამიანებს.
- როგორი გემოვნებით გამოირჩევიან ისისნი? რა ფერებს და სტილს ანიჭებენ უპირატესობას?
— ამ შემთხვევაში ალბათ თავიანთი მეორე ნახევრების გემოვნებას ითვალისწინებენ.
- ქალის გარეგნობაში რამდენად მნიშვნელოვანი ადგილი უკავია სამკაულს? რა განწყობას უქმნის ლამაზი სამკაული, აქსესუარი ქალს?
— ქალისთვის სამკაული რა თქმა უნდა მნიშვნელოვანი დეტალია. მე ჩემს ნახელავს ჯინსების სამკაულს ვუწოდებ, რადგან ჩემი აზრით ყველაზე მეტად მას უხდება. თუმცა ბევრი ჩემს ნახელავს კლასიკურ სამოსსაც უხამებს.
- რა ფერები და სტილია დღეს მოდური და აქტუალური?
— ძირითადად ზაფხულის ფერებია აქტუალური.
- რა გეგმები გაქვთ სამომავლოდ?
— შორს მიმავალი გეგმები არ მაქვს. შესაძლოა პერსონალური გამოფენაც მოვაწყო. შევქმნი სამკაულებს სანამ ეს სიამოვნებას მომანიჭებს…
