თბილისი, 10 მაისი — Sputnik. დიდ დიღომში ძლიერმა ქარმა მშენებარე კორპუსის კედელი ჩამოანგრია, ინფორმაცია და შესაბამისი ფოტოები გამოქვეყნდა Facebook-ჯგუფში „დიდი დიღომი“.
პოსტის ავტორის თქმით, ფოტოები დავარის ქუჩაზეა გადაღებული.
უბედური შემთხვევების თავიდან აცილების მიზნით პოლიციამ ტერიტორია გუშინ, ღამით გადაკეტა – მშენებარე ობიექტიდან აგურები და სხადასხვა საგნები ცვიოდა.
ძლიერმა ქარმა, რომელიც თბილისში კვირას, დღის მეორე ნახევარში ამოვარდა, თემქაზე ხე მოგლიჯა, რომელმაც რამდენიმე ავტომობილი მოიყოლა.
საგანგებო სიტუაციების მართვის სამსახურის მონაცემებით, შემთხვევის შედეგად ოთხი ავტომობილი დაზიანდა, თუმცა ინციდენტის შედეგად არავინ დაშავებულა.
ადგილობრივი მცხოვრებლების თქმით, ძლიერმა ქარმა რამდენიმე სახლის სახურავი დააზიანა.
ამას გარდა გუშინ ძლიერი ქარის გამო ვაკეში, კავსაძის ქუჩაზე წაქცეულმა ხემ რამდენიმე ავტომობილი დააზიანა.
