თბილისი, 29 ნოემბერი – Sputnik. „საქართველოს გაზის ტრანსპორტირების კომპანიის" სპეციალისტებმა გურიასა და აჭარაში მდებარე სტრატეგიულ ობიექტებს, კოვიდ-სასტუმროებსა და საავადმყოფოებს გაზმომარაგება აღუდგინეს.
ბუნებრივი აირით მომარაგება სრულად აღდგება დღის განმავლობაში, ნათქვამია კომპანიის ვებგვერდზე.
„ქუთაისი-სოხუმის" მაგისტრალური გაზსადენის ქობულეთის 500 მმ-იან განშტოებაზე ავარიის შედეგად შაბათს საქართველოს ორი რეგიონი ბუნებრივი აირის გარეშე დარჩა. გაზის ბალონების დასატენად გაზგასამართ სადგურებთან უამრავი ხალხი მივიდა, დადგა გრძელი რიგები.
შუაღამეს გაზის მიწოდება აღუდგა სტრატეგიულ ობიექტებს, კოვიდ-სასტუმროებსა და საავადმყოფოებს. ყველასათვის გაზმომარაგების ეტაპობრივი აღდგენა დღეს დილით 09:00 საათიდან დაიწყო და დღის ბოლომდე გაგრძელდება.
