თბილისი, 21 ოქტომბერი – Sputnik. საბაჟო დეპარტამენტის თანამშრომლებმა საკონტროლო-გამშვები პუნქტი „სარფის“ გავლით ვადაგასული ხორცპროდუქტების შემოტანის მცდელობა აღკვეთეს, იუწყება ფინანსთა სამინისტროს შემოსავლების სამსახური.
შემოსავლების სამსახურის საბაჟო დეპარტამენტის სანიტარიული, ფიტოსანიტარიული და ვეტერინარული კონტროლის სამმართველოს თანამშრომლებმა დაადგინეს, რომ „სარფის“ საბაჟო-გამშვები პუნქტის გავლით შემოსული 432 კილოგრამი შერეული დასახელების გაყინული ხორცის პროდუქტი ვადაგასული იყო. სამსახურის ინფორმაციით, პროდუქცია არ აკმაყოფილებდა საქართველოს იმპორტის სასაქონლო ოპერაციის მოთხოვნებს და საზოგადოებრივი ჯანმრთელობისათვის საფრთხეს წარმოადგენდა.
არსებული კანონმდებლობით, ქვეყანაში საკარანტინო რისკის მქონე პროდუქციის შემოტანისა და გავრცელების თავიდან აცილების მიზნით, საქონელი განადგურებას დაექვემდებარა.
ფინანსთა სამინისტროს შემოსავლების სამსახური საერთაშორისო მიმოსვლისათვის გახსნილ საზღვაო პორტებში, აეროპორტებსა და სახმელეთო კონტროლის ზონებში მკაცრ სანიტარიულ-საკარანტინო კონტროლს განაგრძობს.
