თბილისი, 21 ოქტომბერი - Sputnik. „საქართველოს ბანკი" სრულ კოორდინაციაშია შინაგან საქმეთა სამინისტროსთან და მათი მითითების შესაბამისად მოქმედებს, აცნობეს „Sputnik–საქართველოს“ ბანკის პრეს-ცენტრში.
რამდენიმე საათის წინ ზუგდიდში, ზვიად გამსახურდიას გამზირზე მდებარე „საქართველოს ბანკის“ ფილიალზე თავდასხმა მოხდა. გავრცელებული ინფორმაციით, შეიარაღებულ პირს მძევლად 19 ადამიანი – ბანკის თანამშრომლები და კლიენტები ჰყავს აყვანილი.
„ჩვენ სრულ კოორდინაციაში ვართ შინაგან საქმეთა სამინისტროსთან. ვმოქმედებთ მათი მითითებების შესაბამისად. ჩვენი შესაძლებლობების ფარგლებში გავაკეთებთ ყველაფერს, რომ პროცესი მშვიდობიანად დასრულდეს“, – აღნიშნეს „საქართველოს ბანკში".
თავდამსხმელი 500 ათას დოლარს, ვერტმფრენს და შენობიდან უსაფრთხოდ გასვლის გარანტიებს მოითხოვს და ამ მოთხოვნების შესასრულებლად 2 საათს იძლევა.
„საქართველოს ბანკის" ზუგდიდის ფილიალთან ამ დროისათვის მობილიზებული არიან სამართალდამცველები და მიმდინარეობს დამნაშავის გაუვნებელყოფის ოპერაცია.
