თბილისი, 11 ნოემბერი — Sputnik. რუსთავი–ლილოს ავტომაგისტრალზე მომხდარი ავარიის შედეგად დაშავებული 10 წლის ბიჭის მდგომარეობა უკიდურესად მძიმეა, იუწყება ტელეკომპანია Rustavi 2.
ავტოსაგზაო შემთხვევა გუშინ, საღამოს მოხდა. გავრცელებული ინფორმაციით, ერთმანეთს ორი მსუბუქი ავტომობილი შეეჯახა, რასაც ორი ადამიანის სიცოცხლე ემსხვერპლა – შემთხვევის შედეგად ადგილზე გარდაიცვალა მცირეწლოვანი ბავშვი და შუახნის ქალი. ინციდენტისას სულ 5 ადამიანი დაშავდა.
10 წლის მოზარდი გვიან ღამით რუსთავის საავადმყოფოდან თბილისში გადმოიყვანეს – იგი მართვით სუნთქვაზე იმყოფება.
ასევე მძიმეა კიდევ ერთი დაშავებული მამაკაცის მდგომარეობა, რომელიც რუსთავის კლინიკაში აგრძელებს მკურნალობას.
მომხდარზე გამოძიება სსკ-ის 276-ე მუხლის მე-8 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ორი ან ორზე მეტი ადამიანის სიცოცხლის მოსპობა გამოიწვია.
