თბილისი, 22 აგვისტო — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა ყალბი 100-ლარიანი კუპიურების დამზადება–გასაღების ფაქტზე ორი პირი დააკავეს, აღნიშნულია უწყების განცხადებაში.
გამოძიებით დადგინდა, რომ ბრალდებულებმა თბილისის სხვადასხვა სავაჭრო ობიექტში გაასაღეს ცხრა ცალი ყალბი 100-ლარიანი კუპიურა.
ფრთხილად! საქართველოში მიმოქცევაში ყალბი 500-ევროიანი კუპიურებია>>
სამართალდამცველებმა დაკავებულების ჩხრეკისას დამატებით ამოიღეს 2 ცალი ყალბი 100-ლარიანი კუპიურა, ასევე ყალბი ფულის დასამზადებლად საჭირო ტექნიკური მოწყობილობები და პოლიგრაფიული მასალა.
გამოძიება სსკ-ის 212-ე მუხლის მეორე ნაწილით მიმდინარეობს, რაც 7-დან 10 წლამდე პატიმრობას ითვალისწინებს.