თბილისი, 22 აპრილი — Sputnik. შრი-ლანკაში მომხდარი აფეთქებების შედეგად დაშავებულთა შორის საქართველოს მოქალაქეები არ არიან, იუწყება ტელეკომპანია Rustavi2 ინდოეთში საქართველოს კონსულის ირაკლი აბესაძის განცხადებაზე დაყრდნობით.
ტერორისტული შეტევა შრი-ლანკაზე: დაიღუპა 180 ადამიანი>>>
21 აპრილს შრი-ლანკის დედაქალაქ კოლომბოს და ქვეყნის სხვა ნაწილებში მდებარე კათოლიკურ ეკლესიებსა და სასტუმროებში აღდგომის დღესასწაულის დროს რვა აფეთქება მოხდა. აფეთქების შედეგად დაღუპულთა რაოდენობა 290-მდე გაიზარდა. დაღუპულებს შორის არიან ბავშვებიც. 500-ზე მეტი დაშავებული საავადმყოფოებშია გადაყვანილი.
ირაკლი აბესაძის განცხადებით, საელჩოს წარმომადგენლები მონიტორინგს აგრძელებენ და აქვთ კომუნიკაცია საქართველოს მოქალაქეებთან.
„დაშავებულთა შორის საქართველოს მოქალაქეები არ არიან. საქართველოს ოთხი მოქალაქე ტურისტული მიზნით იმყოფება დედაქალაქიდან მოშორებით, ისინი უსაფრთხო ადგილზე არიან და დაგეგმილ ვადებში აპირებენ დაბრუნებას“, – განაცხადა კონსულმა.
აბესაძის ინფორმაციით, შრი-ლანკაზე ყველა საერთაშორისო აეროპორტი მუშაობას ჩვეულ რეჟიმში განაგრძობს.
აფეთქებები შრი-ლანკაზე, სავარაუდოდ, თვითმკვლელმა ტერორისტებმა მოაწყვეს, იუწყება გამოცემა Daily Mirror გამოძიებასთან დაახლოებულ წყაროზე დაყრდნობით. შრი-ლანკაზე თავდასხმების სერიაზე პასუხისმგებლობა ამ დრომდე არც ერთ დაჯგუფებას არ აუღია.
