თბილისი, 18 მარტი — Sputnik. მეხანძრეებმა დიდ დიღომში ტექნიკის მაღაზიის საწყობში გაჩენილი ხანძრის ჩაქრობის დროს ლეკვები გადაარჩინეს.
ლეკვებით ხელში მეხანძრეების ფოტომ, რომელიც საგანგებო სიტუაციების მართვის სამსახურის Facebook-გვერდზე გამოჩნდა, ათასობით მოწონება, გაზიარება და კომენტარი დააგროვა.
„ჩვენი დროის გმირები! გადარჩენილი ოთხფეხა მეგობრები! მადლობა 112-ის ყველა თანამშრომელს", – წერს სოციალური ქსელის მომხმარებელი რუსიკო ჯალაღანია.
ფოტოზე კომენტარი დატოვა ცნობილმა ტელეწამყვანმა და ჟურნალისტმა ინგა გრიგოლიამ.
„სასწაული ფოტოა. უმაგრესი ბიჭები და ციცქნა, გადარჩენილი ლეკვინოები", – წერს ინგა გრიგოლია.
სოცქსელის რამდენიმე მომხმარებელს ლეკვების წაყვანის სურვილი გაუჩნდა.
„მაჩუქეთ ეს ლეკვები", – დაწერა Dima Kiladze-მ.
თუმცა, მეხანძრეებმა გადაწყვიტეს ლეკვების თავისთან, სამსახურში წაყვანა.
დიდ დიღომში Goodwill-ის მიმდებარე ტერიტორიაზე ძლიერი ხანძარი საოჯახო ტექნიკის მაღაზიის საწყობში კვირას, გვიან ღამით გაჩნდა. შემთხევვის ადგილზე მობილიზებული იყო 23 სახანძრო-სამაშველო ბრიგადა. ხანძრის შედეგად დაახლოებით 1,8 ათასი კვადრატული მეტრი ფართობი დაიწვა.
ხანძრის შედეგად ერთი ადამიანი დაშავდა. იგი საავადმყოფოშია გადაყვანილი, მის სიცოცხლეს საფრთხე არ ემუქრება. ხანძრის მიზეზი დგინდება.