თბილისი, 5 ნოემბერი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა თბილისში 9 ათას ბოთლამდე ფალსიფიცირებული სარეცხი საშუალება „ფეირი" ამოიღეს, ნათქვამია უწყების მიერ გავრცელებულ განცხადებაში.
გამოძიებით დადგინდა, რომ სარეცხი საშუალებების რეალიზატორი ერთ-ერთი კომპანიის ხელმძღვანელი უკანონო მატერიალური სარგებლის მიღების მიზნით თბილისში კუსტარულად მოწყობილ საამქროში სხვისი სასაქონლო ნიშნის მართლსაწინააღმდეგო გამოყენების გზით ახორციელებდა „ფეირის“ სამარკო ნიშნით იაფფასიანი სარეცხი საშუალების ჩამოსხმას და საქართველოს მასშტაბით რეალიზაციას.
სამართალდამცველებმა საწარმოდან ნივთმტკიცების სახით ბოთლები და ეტიკეტები ამოიღეს.
მომხდარ ფაქტზე გამოძიება მიმდინარეობს სსკ-ის 196-ე მუხლის პირველი ნაწილით, რაც სასაქონლო ნიშნის ან სხვა კომერციული აღნიშვნის მართლსაწინააღმდეგო გამოყენებას გულისხმობს და სასჯელის სახით ითვალისწინებს თავისუფლების აღკვეთას ორ წლამდე ვადით.
