თბილისი, 19 აგვისტო — Sputnik. შინაგან საქმეთა სამინისტროს თბილისის პოლიციის დეპარტამენტის ძველი თბილისის სამმართველოს თანამშრომლებმა ეროვნულ-დემოკრატიული პარტიის ოფისის გაქურდვის ფაქტზე, მანგლისში 32 წლის მამაკაცი დააკავეს, ნათქვამია უწყების მიერ გავრცელებულ განცხადებაში.
დაკავებული წარსულში ნასამართლევია და ამჟამად პირობითი მსჯავრის ქვეშ იმყოფება.
შემთხვევა შაბათს გამთენიისას მოხდა. ოფისი პარტიის წარმომადგენლებს დილით გატეხილი დახვდათ. პარტიის თავმჯდომარე ბაჩუკი ქარდავას განცხადებით, ოფისიდან წაღებულია 5 კომპიუტერი, რომელშიც მნიშვნელოვანი ინფორმაცია ინახებოდა.
გამოძიების ინფორმაციით, დაკავებულმა თბილისში, რუსთაველის გამზირზე მდებარე „ეროვნულ-დემოკრატიული პარტიის" ოფისიდან ტექნიკა მოიპარა და შემთხვევის ადგილიდან მიიმალა. სამართალდამცველებმა ის ცხელ კვალზე დააკავეს, ნაქურდალი ნივთები კი ელბაქიძის ქუჩაზე მდებარე ლომბარდიდან ნივთმტკიცების სახით ამოიღეს.
გამოძიება ქურდობის ფაქტზე, საქართველოს სსკ-ს 177-ე მუხლის მე-2 ნაწილის „ა" და „ბ" ქვეპუნქტებით მიმდინარეობს. დანაშაული 3-დან 5 წლამდე ვადით თავისუფლების აღკვეთას ითვალისწინებს.
