თბილისი, 5 აგვისტო — Sputnik. თელავის სოფელ ყარაჯალაში შვილიშვილმა პაპა ცივი იარაღით დაჭრა, ბებიას კი ფიზიკურად გაუსწორდა, იუწყება საზოგადოებრივი მაუწყებლის პირველ არხი.
თვითმხილველების თქმით, შემთხვევას წინ ურთიერთშელაპარაკება უძღოდა, რა დროსაც ახალგაზრდამ ცივი იარაღით მოხუცი მამაკაცი გულ-მკერდის არეში დაჭრა, ბებიას კი ფიზიკურად გაუსწორდა. ქალს მრავლობითი დაზიანებები თავის არეში აქვს მიყენებული. ცოლ-ქმარი თელავის რეფერალურ საავადმყოფოში გადაიყვანეს.
ადგილზე მობილიზებული იყო სასწრაფო-სამედიცინო დახმარების ბრიგადები და საპატრულო პოლიციის ეკიპაჟები.
შინაგან საქმეთა სამინისტროს ინფორმაციით, ბრალდებული სამართალდამცველებმა ცხელ კვალზე დააკავეს.
მომხდარზე გამოძიება საქართველოს სსკ-ის 117-ე მუხლით დაიწყო, რაც ჯანმრთელობის განზრახ მძიმე დაზიანებას გულისხმობს და ისჯება თავისუფლების აღკვეთით ვადით სამიდან ექვს წლამდე.