თბილისი, 3 ივლისი — Sputnik. სამართალდამცველებმა ბათუმში ჯგუფური ძარცვის ბრალდებით სამი პირი დააკავეს, ნათქვამია შინაგან საქმეთა სამინისტროს პრეს-სამსახურის მიერ გავრცელებულ განცხადებაში.
უწყების ცნობით, ბრალდებულებმა 1 ივლისს ბათუმში, აეროპორტის გზატკეცილზე თურქეთის მოქალაქეებს 2,1 ათასი თურქული ლირა გასტაცეს და შემთხვევის ადგილიდან მიიმალნენ.
სამართალდამცველებმა სამივე პირი — 28 წლის მ.ბ., 31 წლის გ.ბ. და 33 წლის პირობითი მსჯავრის ქვეშ მყოფი მ.მ. ცხელ კვალზე დააკავეს. გატაცებული თანხა ნივთმტკიცების სახით სრულადაა ამოღებული.
საქმეზე გამოძიება წინასწარი შეთანხმებით ჯგუფის მიერ ჩადენილ ძარცვის ფაქტზე (სსკ-ის 178-ე მუხლის მე-2 და მე-3 ნაწილი) მიმდინარეობს, რაც ხუთიდან რვა წლამდე ვადით თავისუფლების აღკვეთას ითვალისწინებს.
