თბილისი, 19 მაისი – Sputnik. სამართალდამცველებმა ყალბი ფულის გასაღების ფაქტზე საქართველოს და რუსეთის მოქალაქეები დააკავეს, ნათქვამია საქართველოს უსაფრთხოების სამსახურის მიერ გავრცელებულ განცხადებაში.
გავრცელებული ინფორმაციით, დმანისის რაიონში მცხოვრებმა ტანრივერდი კ.-მ საქართველოს მოქალაქეს ყალბი ფულის შესყიდვა შესთავაზა. მისი განმარტებით, ყალბი ფული მას თურქეთის რესპუბლიკიდან ჰქონდა შემოტანილი.
„ტანრივერდი კ.-მ და მისმა თანამზრახველმა, რუსეთის მოქალაქე ვილაიატ ა.-მ აღნიშნულ მოქალაქეს ორ ნაწილად გადასცეს 4000 აშშ დოლარის ოდენობით ყალბი ფული, რის სანაცვლოდაც 1400 აშშ დოლარი აიღეს. სუს-ის ანტიკორუფციული სააგენტოს თანამშრომლებმა ტანრივერდი კ. და ვილაიატ ა. ბრალდებულის სახით დააკავეს“, — ნათქვამია განცხადებაში.
გამოძიება წინასწარი შეთანხმებით ჯგუფის მიერ, ყალბი ფულის დამზადების ფაქტზე, საქართველოს სსკ-ის 212 მუხლით მიმდინარეობს, რაც სასჯელის სახით 7-დან 10 წლამდე თავისუფლების აღკვეთას ითვალისწინებს.
