თბილისი, 24 აპრილი — Sputnik. თბილისში ფსიქოტროპული აფთიაქი დააყაჩაღეს, ფარმაცევტს კი ცივი იარაღით მსუბუქი ჭრილობა მიაყენეს, ნათქვამია საქართველოს შინაგან საქმეთა სამინისტროს მიერ გავრცელებულ განცხადებაში.
შემთხვევა ი. ჯავახიშვილის ქუჩაზე გუშინ მოხდა.
სამართალდამცავებმა წარსულში ნასამართლევი 2 პირი — 1976 წელს დაბადებული ა.ტ. და 1987 წელს დაბადებული გ.შ. ცხელ კვალზე, კახეთის გზატკეცილზე დააკავეს.
„დაკავებულებმა ფსიქოტროპული აფთიაქის გამყიდველს ცივი იარაღის მუქარით, თანხა და პირადი ნივთები გასტაცეს. ერთ-ერთმა თავდამსხმელმა ქალს მსუბუქი ჭრილობა მიაყენა. დაშავებულს კლინიკაში სამედიცინო დახმარება გაეწია და სახლში გაწერეს",- ნათქვამია განცხადებაში.
სამართალდამცველებმა ერთ-ერთი ბრალდებულის საცხოვრებელი ბინის ჩხრეკისას, პოლიციამ ნაყაჩაღარი ნივთები — თანხის ნაწილი, აფთიაქის თანამშრომლის მართვის მოწმობა, საბანკო პლასტიკური ბარათები, სავარაუდოდ, დანაშაულის ჩადენის იარაღი და ის ტანსაცმელი ამოიღო, რომელიც დაკავებულებს ყაჩაღობის დროს ეცვათ.
საქმეზე გამოძიება საქართველოს სსკ-ის მუხლის 179-ე მუხლის მე-2 და მე-3 ნაწილებით მიმდინარეობს, რაც განმეორებით ჩადენილ ჯგუფურ ყაჩაღობას გულისხმობს. დანაშაული 6-დან 12 წლამდე ვადით თავისუფლების აღკვეთას ითვალისწინებს.
