თბილისი, 18 იანვარი — Sputnik. საქართველოს ფინანსთა სამინისტროს საგამოძიებო სამსახურის თანამშრომლებმა აჭარაში ნებართვის გარეშე მოქმედი სამორინე გამოავლინეს, სადაც, აზარტული და მომგებიანი თამაშები სისტემურ-ელექტრონული ფორმით ტარდებოდა, ნათქვამია უწყების მიერ გავრცელებულ განცხადებაში.
როგორც „Sputnik საქართველოს" უწყების პრეს-სამსახურში განუცხადეს, ხელვაჩაურის მუნიციპალიტეტის ერთ-ერთ სოფელში პირთა ჯგუფი, დიდი ოდენობით შემოსავლის მოგების მიღების მიზნით, საცხოვრებელ ბინაში ორგანიზებას უწევდა აზარტული თამაშების — სათამაშო ბორბლის (ე.წ. რულეტკა) და ბინგოს სისტემურ-ელექტრონული ფორმით ჩატარებას.
აღნიშნული საქმიანობის შედეგად, სახელმწიფო ბიუჯეტისთვის მიყენებულმა ზიანმა 390 000 ლარი შეადგინა.
გამოძიება სსკ-ის 192-ე მუხლის მეორე ნაწილით მიმდინარეობს, რაც გულისხმობს ჯგუფურად ჩადენილ უკანონო სამეწარმეო საქმიანობას და ითვალისწინებს სამიდან ხუთ წლამდე ვადით თავისუფლების აღკვეთას.